විකුණගන්න බැරිව ලංකා ඇපල් ගවයන්ට දෙයි

ශ්‍රී ලංකා ඇපල් යන නමින් දෙස් විදෙස් හි ප්‍රසිද්ධයට පත්ව ඇති රාගල පෙයාර්ස් අස්වනු නිසි මිලකට විකුණා ගත නොහැකිවීම හේතුවෙන් තම  අස්වනු මේ දිනවල හරකුන්ට කෑමට ලබාදීමට පියවර ගෙන ඇතැයි  රාගල පෙයාර්ස් ගොවියෝ පවසති.

රට අගුළු දමා ඇති තත්ත්වය මත නුවරඑළියට සංචාරකයන් නොපැමිණීමත් මෙන්ම අස්වනු කොළඹ හා අනෙකුත් නගරවලට ප්‍රවාහනය කිරීමට ඇති අපහසුතාවයත් එමෙන්ම එම ප්‍රදේශවල අළෙවිකරුවන්ට ඒවා විකුණා ගැනීමට නොහැකිවීම මත රාගල පෙයාර්ස් වගාව ගස්යට වැටී කුණු වී  යන බවද රාගල පෙයාර්ස් ගොවීයෝ සඳහන් කරති.

රාගල කඳු පන්තිය අවට පිහිටි ගෝනකැලේ, බිංගන්තලාව, රත්නායකපතන, පළල්පතන, මන්ත්‍රීතැන්න ආදී ගම්මාන ආශ්‍රිතව පෙයාර්ස් වගාව බහුලව සිදු කරන බවත් ඒ අවට අනෙකුත් ගම්මානවලද පෙයාර්ස් විවිධ ප්‍රමාණයන්ගෙන් වගා කරන බවත් මෙවර  පෙයාර්ස්  අස්වැන්න ඉතාමත් සරුවට වැඩී ඇති බවත් එම අස්වැන්න මේ දිනවල කඩා අවසන් කරන මට්ටමට පැමිණ ඇති බවත්  ගොවියෝ පවසති.

මේ වනවිට පෙයාර්ස් කිලෝවක් රුපියල් සියයකටවත්  හෝ විකුණා ගැනීමට නොහැකි තත්තවයක් නිර්මාණය වී ඇති බවත් 2019 වසරේ පාස්කු ප්‍රහාරය මෙන්ම පසුගිය වසරේ හා මෙම වසරේ කොරෝනා බලපෑම හේතුවෙන් වසර තුනක කාලයක පටන් රාගල පෙයාර්ස් නිසි මිළකට අලෙවි කර ගැනීමට නොහැකිව තමන් දැඩි ආර්ථික දුෂ්කරතා හා විවිධ අපහසුතාවයන්ට ලක්ව ඇතැයි රාගල පෙයාර්ස් ගොවියෝ කියති.

නිවරදි වෙළෙඳ  පොලක් ලබාදී රාගල පොයාර්ස් ගොවීන් රැක ගැනීමේ වැඩසටහනක් කඩිනමින් ක්‍රියාත්මක කරන ලෙස රජයේ වගකියයුතු අංශවලින් එම ගොවියෝ වැඩිදුරටත් ඉල්ලා සිටිති.

ශාන් හුලංනුගේ