ලිබියානු අගමැතිට කොවිඩ් එන්නත ලබාදෙමින් එරට එන්නත්කරණය ආරම්භ වේ

ලිබියානු අගමැති අබ්දුල් හමීඩ් ඩෙබෙයිහ් එරට ප්‍රථම වරට කොවිඩ්-19 මර්දන එන්නත ලබාගනිමින්, ලිබියාවේ එන්නත්කරණ වැඩසටහන ආරම්භ කර තිබේ.

ලිබියාවේ දිගු කලක් ප්‍රමාද වූ කොරෝනා එන්නත් කිරීමේ වැඩසටහන ඊයේ (10දා) එරට නව එක්සත් රජය විසින් දියත් කරන ලදී.

කෙසේ වෙතත් තමාට ලැබුණු එන්නත කුමක්දැයි අනාවරණය නොකළද අගමැති අබ්දුල් හමීඩ් ඩෙබෙයිහ් එන්නත ලබාගත් පළමු වැනි පුද්ගලයා බවට පත්විය.

එමෙන්ම එරට ඉදිරි පෙළ සේවකයන්ට සහ අවදානමට ලක්විය හැකි කණ්ඩායම්වලට එන්න්තරණයේදී ප්‍රමුඛත්වය දෙන බවද සඳහන් කරයි.

පසුගිය සතිය තුළ ලිබියාවට කොරෝනා මර්දන එන්නත් මාත්‍රාවන් 160,000ක් ලැබී තිබූ අතර, අගමැතිවරයා සජීව රූපවාහිනී ප්‍රචාරයක් සමග සිය එන්නත ලබාගත්තේය. මෙම සතියේ පැමිණි මාත්‍රාවලින් අවම වශයෙන් 100,000ක් රුසියාවේ ස්පුට්නික්-වී එන්නත විය.

ලිබියාවේ කොවිඩ්-19 ආසාදිතයන් 167,732ක් රට තුළ වාර්තා වී ඇති අතර මරණ සංඛ්‍යාව 2,815කි.