රටේ ආර්ථිකය ගොඩනැගීමට වැවිලි ක්ෂේත්‍රයට පුළුල් දායකත්වයක් දෙන්න පිළිවන් - ජනපති

ඉලක්කයක් ඇතිව වැඩ කළහොත් රටේ ආර්ථිකය ගොඩගැනීමට දායකවීමේ පුළුල් හැකියාවක් වැවිලි ක්ෂේත්‍රය සතුව ඇති බව ජනාධිපති ගෝඨාභය රාජපක්ෂ මැතිතුමා පවසයි.

ජන ජීවිතය යථා තත්වයට පත් කරමින් අර්ථිකය විවෘත කිරීමත් සමග වැවිලි ක්ෂේත්‍රය වැදගත් අංශයක් ලෙස ඊට සූදානම් වන්නේ කෙසේද යන්න පිළිබඳව අද (12) දහවල් ජනාධිපති කාර්යාලයේ පැවති සාකච්ඡාවේ දී ජනාධිපතිතුමා එසේ සදහන් කළේය.

ලොව සියලු රටවල් දැඩි දුෂ්කරතාවන්ට  මුහුණ පා සිටී. ආනයන සීමා කරමින් අභියෝග කළමනාකරණය කිරීමට  තම රජයට හැකි වූ බව පෙන්වාදුන් ජනාධිපතිතුමා වැවිලි ක්ෂේත්‍රයට උත්පාදනය කළ හැකි බොහෝ දේ අනවශ්‍ය ලෙස ආනයනය කර ඇතැයි පැවසීය.

දේශීය ආර්ථිකය ගොඩනැගීමේදී වැවිලි ක්ෂේත්‍රයට ප්‍රමුඛ කාර්ය භාරයක් පැවරී තිබේ. එය අවබෝධ කර ගෙන පාඩු ලබන වතු ලාභ ලබන තත්වයට කඩිනමින් දියුණු කළයුතුයයි ජනාධිපතිතුමා කියා සිටියේය.

ජනතාවගේ ආහාර සුරක්ෂිතතාව සහතික කිරීමේ වැදගත්කම පෙන්වා දුන් රාජපක්ෂ මැතිතුමා අපනයන ප්‍රවර්ධනයට ගතයුතු ක්‍රියාමාර්ග දීර්ඝ ලෙස සාකච්ඡාවට ලක් කළේය.

අපනයනය ඉලක්ක කරගත් භෝග කෙරෙහි විශේෂ අවධානය යොමු විය යුතුය. අගය එකතු කිරීම මත කුරුඳු, ගම්මිරිස් ඇතුළු ප්‍රධාන වැවිලි මගින් ඉහළ අපනයන ආදායමක් ඉපැයීමට සැලසුම් කරන්නැයි ජනාධිපතිතුමා උපදෙස් දුන්නේය.

2018 වසරේදී මෙරට වැවිලි භෝග අපනයන ආදායම රුපියල් බිලියන 538කි. 2022 වන විට එය රුපියල් බිලියන 753 දක්වා නැංවීම තම අමාත්‍යාංශයේ අපේක්ෂාව බව වැවිලි කර්මාන්ත හා අපනයන කෘෂිකර්ම අමාත්‍ය වෛද්‍ය රමේෂ් පතිරණ මහතා පැවසීය.

දේශීය වෙළෙඳපොළ හා අපනයනය ඉලක්ක කර ගනිමින් පොල් වගාව සංවර්ධනය කිරීමට සැලසුම් කර ඇති බව කී පතිරණ මහතා පලෙයි, කිලිනොච්චි සහ මුලතිව් යන උතුරේ ප්‍රදේශවල ද පොල් වගාව සාර්ථක වී ඇතැයි සඳහන් කළේය. කොකෝවා සහ කෝපි වගාව දියුණු කිරීමට ද පියවර ගෙන තිබේ. යුද හමුදාවේ කෘෂිකර්ම ඒකකයක් පිහිටුවා වගාවන්ට සහායවිය  හැකි බව ජනාධිපතිතුමා පැවසීය.

සියලු වැවිලි භෝග ඉහළ ප්‍රමිතියෙන් යුතුව අපනයනය කළයුතු බවද ජනාධිපතිතුමා අවධාරණය කළේය. ජනතා වතු සංවර්ධන මණ්ඩලය පාඩු ලැබීමට හේතු විමර්ශනය කොට ඉක්මණින් ලාබ ලැබීමට ඉවහල්වන අයුරින් වැවිලි සංස්ථාව සතු දැව අපනයනය විධිමත් කරන ලෙස ද එතුමා උපදෙස් දුන්නේය.