රාජ්‍ය මුල්‍ය ආදායමෙන් සියයට 74ක් ලැබී අවසන්

2020 රාජ්‍ය මූල්‍ය ආදායමෙන් මේ වන විට 74%ක් ලැබී අවසන් යැයිද එම මුදල, අපේක්ෂිත මුළු රාජ්‍ය ආදායම වන රුපියල් බිලියන 1580න් 1124ක් වන බවද ඊයේ (26) රජයේ මුදල් කමිටුවේදී අනාවරණය විය.

මුදල් අමාත්‍යංශ  සහ භාණ්ඩාගාර ලේකම් එස්.ආර්.ආටිගල මහතා මේ බව ප්‍රකාශ කළේ රජයේ මුදල් කාරක සභාවේ සභාපති අනුර ප්‍රියදර්ශන යාපා 2020 වසරෙහි රාජ්‍ය ආදායම පිළිබඳව සිදුකළ විමසුමකට පිළිතුරු දෙමිනි.

අනුර ප්‍රියදර්ශන යාපා මහතාගේගේ සභාපතීත්වයෙන්  ඊයේ  (26) රජයේ  මුදල් කාරක සභාව  පාර්ලිමේන්තුවේදී රැස්වූ අතර මෙම අවස්ථාව සඳහා රජයේ මුදල් කමිටුවේ සාමාජිකයන් වන රාජ්‍ය අමාත්‍ය සුසිල් ප්‍රේම්ජයන්ත් සහ එම්.ඒ.සුමන්දිරන් , ආචාර්ය හර්ෂ ද සිල්වා, ඩිලාන් පෙරේරා , අනුප පැස්කුවල්, සහන් ප්‍රදීප් යන  මන්ත්‍රීවරු සහභාගී වූහ.

ඔවුනට අමතරව,එම රැස්වීම සඳහා එස්.ආර්.ආටිගල මහතා ඇතුළු  මුදල් අමාත්‍යාංශයේ ඉහළ පෙළේ නිලධාරීන් පිරිසක් ද ,ප්‍රතිපත්ති අධ්‍යයන ආයතනයේ- ආර්ථික පර්යේෂණ (IPS) ආර්ථික විශේෂඥයන් පිරිසක්ද, විගණකාධිපති දෙපාර්තමේන්තුව නියෝජනය කරමින්  නිලධාරීන් ද, හිටපු විගණකාධිපති  සරත් මායාදුන්නේ මහතා ද  සහභාගී ව සිටියහ.

එම කාරක සභාව මෙසේ රැස්වූයේ, ස්ථාවර නියෝග 121 ට අනුව  අයවැය ඉදිරිපත් කිරීමෙන් අනතුරුව සති 06 ක් ඇතුළතදී එම  මුදල් වෙන් කිරීම  රජයේ ප්‍රතිපත්ති සමඟ සමපාත වන්නේද සහ ඇස්තමේන්තුකරණය පිළිබඳව වාර්තාවක් මෙම කාරක සභාව විසින් පාර්ලිමේන්තුව වෙත ඉදිරිපත් කිරීම පිණිසය.

අයවැය හා සම්බන්ධ සියලුම දත්ත අතිශය නිරවද්‍ය වීම ඉතා වැදගත් බව මෙහිදී  පෙන්වා දුන් ආචාර්ය හර්ෂ ද සිල්වා මහතා එය ඉදිරි අනාගතයේ මෙරට ආර්ථික තත්ත්වය සම්බන්ධව දේශීය හා විදේශීය වශයෙන් දැඩි ලෙස බලපාන්නක් බවද කාරක සභාවට පෙන්වා දුන්නේය.