බූස්ස බන්ධනාගාරයේ නිලධාරින් අධිකරණ ඇමතිනියගේ ඇගයීමට

බූස්ස බන්ධනාගාරයේ රඳවා සිටින පාතාලනායකයින්ට ලබාදීම සඳහා ගෙන ගිය ජංගම දුරකථන  හා චාජර් සොයා ගත් බන්ධනාගාර නිලධාරීන් අධිකරණ හා බන්ධනාගාර ප්‍රතිසංස්කරණ අමාත්‍ය තීතිඥ තලතා අතුකොරළ මහත්මියගේ ඇගයිමට ඊයේ (17)  ලක් විය.

පසුගිය 12 වන දින බූස්ස බන්ධනාගාරයේ රඳවා සිටින මොහාමඩ් නජීම් මෙහොමඩ් හෙවත් කංජිපානි ඉම්රාන් පාතාල රැඳවියාට ලබාදීම සඳහා රැගෙන ගිය ජංගම දුරකථන දෙකක් හා චාජර් දෙකක් සොයාගත් බූස්ස බන්ධනාගාරයේ සහකාර බන්ධනාගාර අධිකාරි එල්.පී.එම්.කරුණාරත්න, බන්ධනාගාර නියාමකයින් වන ටී.ඕ.කේ.රත්නායක, ඒ.ඩී.ටී.කේ .ආරියදාස ,ඒ.ඩී.එල්.එන්.මෙන්ඩිස් ,ඒ.ජී.චමින්ද ජයසිරි, වයි.පී.එල්.සම්පත් යන නිලධාරීන් මෙලෙස අධිකරණ අමාත්‍යතුමිය අතින් ඇගයිමට ලක් වුහ.

මෙහිදි අදහස් පළ කරමින් අධිකරණ අමාත්‍යතුමිය සඳහන් කළේ බන්ධනාගාර නිලධාරීන් සම්බන්ධව සමාජයේ පවතින වැරදි අවබෝධ නැති කිරීම සදහා මෙවැනි නිර්භීත නිලධාරීන් ඇගයීමට ලක් කිරීම හොඳ  ක්‍රියාවක් බවයි. අමාත්‍යවරිය පැවසුවේ ඉදිරියේදීත් මෙවැනි දේ සිදු කරන නිලධාරීන් සදහා අමාත්‍යාංශය ලෙස අවශ්‍ය ඇගයීම් සිදු කර  දිරි ගැන්වීම් ලබාදීමට කටයුතු කරන බවයි. බන්ධනාගාර දෙපාර්තමේන්තුව විසින්ම බන්ධනාගාරයට එල්ල වී ඇති චෝදනා නිවැරදි කර ගැනීමට මෙවැනි ක්‍රියාවන් තුළින් හැකියාව ලැබෙන බවත්, රාජකාරීය නිවැරදි ලෙස ඉටු කරන අය දෙපාර්තමේන්තුවට වටිනාකමක් එක් කරනු ලබන බවත්, මත්ද්‍රව්‍ය මැඩලීම සදහා රජය ගෙන යන වැඩසටහනට තවත් ශක්තියක් මේ තුළින් උදා වන බවත් අමාත්‍යවරිය වැඩිදුරටත් පැවසුවාය.

මෙහිදී අදහස් දක්වමින් බන්ධනාගාර කොමසාරිස් ජනරාල් ජයසිරි විජයනාත් තෙන්නකෝන් මහතා සදහන් කළේ මෙම නිලධාරීන් ක්‍රියා කළ ආකාරය අනෙකුත් නිලධාරීන්ට ආදර්ශයක් බවයි.

එම ආදර්ශය ලබා ගෙන සෙසු නිලධාරීන්ද දෙපාර්තමේන්තුවේ කීර්තිනාමය ශක්තිමත් කිරීමට කටයුතු කරනු ඇතැයි විශ්වාස කරන බව ද කොමසාරිස් ජනරාල්වරයා සඳහන් කළේය.

අධිකරණ හා බන්ධනාගාර ප්‍රතිසංස්කරණ අමාත්‍යාංශයේ ලේකම් ජයන්ති විජේතුංග, බන්ධනාගාර කොමසාරිස් ජනරාල් ජයසිරි විජයනාත් තෙන්නකෝන්, බන්ධනාගාර කොමසාරිස් (පාලන) බන්දුල ජයසිංහ යන මහත්ම මහත්මින් ඇතුළු අමාත්‍යාංශයේ හා බන්ධනාගාර දෙපාර්තමේන්තුවේ නිලධාරීන් මෙම අවස්ථාවට සහභාගි විය.

කෂිනි හපුආරච්චි