බැසිල්ගේ ඉල්ලීමට කොළඹ වරාය නගරයෙන් ප්‍රතිචාර
කොළඹ වරාය නගර ව්‍යාපෘතිය සෞඛ්‍ය ආරක්ෂිත මුව ආවරණ විසිදහසක් සෞඛ්‍ය අමාත්‍යංශයට පරිත්‍යාග කිරීම අද (13දා) එම අමාත්‍යංශයේ දී සිදු විය. මෙරට තුළ COVID-19 වෛරසය පැතිරයාම වැළැක්වීම සඳහා, සෞඛ්‍ය අංශ ගෙනයන ප්‍රශස්ත ක්‍රියාමාර්ගවලට තවදුරටත් සහාය දැක්වීමේ අරමුණ ඇතිව මෙම පරිත්‍යාගය සිදු කෙරිණි.
CHEC කොළඹ වරාය නගර පුද්ගලික සමාගමේ කළමනාකරණ අධ්‍යක්ෂ Jiang Houliang මහතා විසින් මෙම මුව ආවරණ තොගය සෞඛ්‍ය අමාත්‍ය පවිත්‍රා වන්නිආරච්චි මහත්මිය වෙත පිරිනමනු ලැබීය.
එම අවස්ථාවට සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා ඇතුළු අමාත්‍යංශයේ ඉහළ නිලධාරීන් පිරිසක් එක්ව සිටියේය.
ආර්ථික සංවර්ධන සහ දිළිඳුකම තුරන් කිරීමේ ජනාධිපති කාර්ය සාධක බලකායේ සභාපති බැසිල් රාජපක්ෂ මහතා කොළඹ වරාය නගර ව්‍යාපෘති සමාගම වෙතින් කරන ලද ඉල්ලීමක් ලෙස මෙම පරිත්‍යාගය සිදු කෙරිණි.
ශ්‍රී ලංකා රජයට තවත් ඉතා වැදගත් අවශ්‍යතාවයක් වන පී සී ආර් පරීක්ෂණ කට්ටල ලබා දෙන ලෙසද බැසිල් රාජපක්ෂ මහතා වරාය නගර ව්‍යාපෘති සමාගමෙන් සිදු කරනු ලද ඉල්ලීමට ප්‍රතිචාර ලෙස ව්‍යාපෘතියේ කළමනාකාර අධ්‍යක්ෂවරයා සඳහන් කර සිටියේ එම ඉල්ලීම ද හැකි උපරිම ඉක්මනින් ඉටු කර දීමට උත්සාහ දරණ බවයි.
ශ්‍රී ලංකාවේ COVID-19 දෙවැනි රැල්ල ආරම්භ වීමත් සමග වරාය නගර ව්‍යාපෘතිය විසින් තවත් පරිත්‍යාගයන් කිහිපයක්ම සිදු කරන ලදී . ශ්‍රී ජයවර්ධනපුර රෝහලට මුව ආවරණ දස දහසක් පරිත්‍යාග කිරීම සහ ශ්‍රී ලංකා රේගුවට මුව ආවරණ දෙදහසක් පරිත්‍යාග කිරීම ද මීට ඇතුළත්ය. එම පරිත්‍යාගයන් සහ අද දින සිදුකරන ලද පරිත්‍යාගයන් ගේ සම්පූර්ණ එකතුව රුපියල් මිලියන හතර ඉක්මවයි. මීට පෙර අප්‍රේල් මාසයේ කොළඹ වරාය නගර ව්‍යාපෘතිය විසින් රුපියල් මිලියන හයක් වටිනා ආධාරයන් කොළඹ මැනිං වෙළඳසැල සංකීර්ණයට, ශ්‍රී ලංකා පොලිසියට, කළුතර නාගොඩ රෝහලට, රජයේ ප්‍රවෘත්ති දෙපාර්තමේන්තුවට සහ සෞඛ්‍ය අමාත්‍යාංශයට සිදු කරන ලදී.
ශ්‍රී ලංකාවේ COVID-19 ව්‍යාප්තිය ආරම්භ වීමත් සමග මුව ආවරණ වලට වැඩි ඉල්ලුමක් හටගැනීමත් සමග රට තුළ මුව ආවරණ හිඟයක් ඇති විය. එය හඳුනාගත් කොළඹ වරාය නගර ව්‍යාපෘතිය ශ්‍රී ලංකා රජයට දිගින් දිගටම මෙම පරිත්‍යාගයන් සිදු කිරීමට ඉදිරිපත් විය. මෙම අර්බුදය පාලනය කරගැනීම සඳහා ශ්‍රී ලංකා රජයට කෙරෙන සහයෝගයක් වශයෙන් වරාය නගර ව්‍යාපෘතිය ශ්‍රී ලංකා ජනතාවගෙන් ඉල්ලා සිටින්නේ, මෙම අවස්ථාවේ නිසි සෞඛ්‍ය උපදෙස් පිළිපදිමින් ස්වකීය ආරක්ෂා සහ සමාජ දුරස්ථභාව අනුගමනය කරමින් වගකීම් සහගතව කටයුතු කරන ලෙසයි.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
