බස්නාහිර සතොසින් සහන මිලට එළවළු අලෙවි කෙරේ

ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂ යන මහත්වරුන්ගේ උපදෙස් අනුව පාරිභෝගික ජනතාවට සහන මිලට ආහාර ද්‍රව්‍ය ලබාදීම සඳහා නව ක්‍රමවේදයක් සකස් කර ඇත. මුදල් අමාත්‍යාංශය, දිස්ත්‍රික් ලේකම්වරුන් සහ සමෘද්ධි සංවර්ධන දෙපාර්තමේන්තුව එක්ව ක්‍රියාත්මක කරන මෙම නව ක්‍රමවේදයේ පළමු පියවර ලෙස කොළඹ, ගම්පහ, කළුතර දිස්ත්‍රික් ජනතාවට එළවළු සහන මිලට ලබාගත හැකි වන පරිදි අලෙවි මධ්‍යස්ථාන ආරම්භ කර තිබේ.

එම දිස්ත්‍රික්කයන් තුළ පිහිටි ලංකා සතොස ආයතනයේ තෝරාගත් පරිශ්‍ර 75ක මෙම එළවළු අලෙවි සැල් පිහිටුවා ඇත. ඒ අනුව කොළඹ දිස්ත්‍රික්කය තුළ ස්ථාන 26කදී, ගම්පහ දිස්ත්‍රික්කය තුළ ස්ථාන 41කදී සහ කළුතර දිස්ත්‍රික්කය තුළ ස්ථාන 8කදී මෙම පාරිභෝගික ජනතාවට සහන මිලට එළවළු අලෙවි කෙරේ.

කැරට්, ලීක්ස්, බීටිරූට්, තක්කාලි, වට්ටක්කා, වම්බටු, අමුමිරිස්, සහ ගෝවා වැනි වෙළෙඳ පොළේ මිල අධික එළවළු අඩු මිලට මෙම ස්ථානවලදී ලබාගැනීමට අවස්ථාව සලසා ඇත. බස්නාහිර පළාතෙන් ආරම්භ වූ මෙම වැඩසටහන ඉදිරියේදි තවදුරටත් ව්‍යාප්ත කිරීමට අපේක්ෂිතය.

මේ අතර පාරිභෝගික ජනතාවට අර්තාපල් අඩු මිලට ලබාදීමට රජය පහසුකම් සලසා ඇති අතර, දේශීය ගොවියාගේ අර්තාපල් නිෂ්පාදනය සඳහා සාධාරණ මිලක් ලබා දීමටද රජය නිරතුරුවම අවධානය යොමු කරමින් සිටියි.