පොහොට්ටුවේ පාක්ෂිකයින්ගේ ප්‍රහාරයකින් රිදීමාලියද්ද ප්‍රා.සභා මන්ත්‍රීවරියක රෝහලේ

ශ්‍රී ලංකා පොදුජන පෙරමුණේ  බදුල්ල රැළිය සදහා සහභාගී වු පිරිසක් නැවත නිවෙස් බලා යමින් සිටියදී, රිදිමාලියද්ද, ඌව තිස්සපුර ප්‍රදේශයේ  එක්සත් ජාතික පක්ෂ රිදිමාලියද්ද ප්‍රාදේශිය සභා මන්ත්‍රිවරියකගේ වෙළෙදසැලට  රතිඤ්ඤා දල්වා කලබලයක් ඇති කර, මන්ත්‍රිවරියටද පිරිස් පහරදී කරදර කිරිම හේතුවෙන් ප්‍රතිකාර සදහා පහරකෑමට ලක් වු මන්ත්‍රීවරිය මහියංගණ  මුලික රෝහල වෙත ඊයේ  (09) දින රාත්‍රී ඇතුලත්ව ඇත.

මෙලෙස ප්‍රහාරයට ලක්ව ඇත්තේ රිදිමාලියද්ද, ඌව තිස්සපුර, යාය 10, යන ලිපිනයේ පදිංචි  රිදිමාලියද්ද ප්‍රාදේශිය  සභා මන්ත්‍රිනී ඩි එම් රසිකා දිල්රුක්ෂි දිසානායක මහත්මියයි. ඇය පස් දරු මවකි. දරුවා වඩාගෙන සිටියදී බීමත් පිරිස් තමන්ට අමානුෂික අන්දමින් පහරදුන් බව ඇය පවසන්නීය.

රිදිමාලියද්ද ප්‍රාදේශිය සභාවේ ශ්‍රී ලංකා පොදුජන පෙරමුණේ  මන්ත්‍රීවරයෙක් ඇතුළු  කණ්ඩායමක් විසින් මෙම පහරදීම සිදු කරනු ලැබූ බවට  පහර කෑමට ලක්ව රෝහල් ගත කර සිටින මන්ත්‍රීවරිය පවසන්නීය.

පහරදීම සිදු කරනු ලැබූ ප්‍රාදේශිය සභා මන්ත්‍රීවරයා ඇතුලු පිරිස් අද  (10) දහවල් 1.00  වන තුරු මහියංගණ  පොලීසිය විසින් අත්අඩංගුවට ගෙන නොතිබූ අතර  මහියංගණ  සහකාර පොලිස් අධිකාරී ලක්දාස අබේගුණසේකර මහතාගේ උපදෙස් මත මහියංගණ  පොලීසියේ ස්ථානාධිපති ප්‍රධාන පොලිස් පරික්ෂක ඒස් ජේ ඒ ආර් එල් සේනාධිර මහතා යටතේ පොලිස් නිලධාරින් පිරිසක් විසින් සිද්ධිය සම්බන්ධයෙන් පරික්ෂණ කටයුතු සිදු කරමින් සිටීන අතර පහරදීමට සම්බන්ධ  පිරිස් අත්අඩංගුවට ගැනීම සදහා කටයුතු කරමින් සිටිති.