නිදහස් වෙළඳ කලාපයේ සේවකයින්ට නිවැස්වලට යාමට පොලීසියේ හා හමුදාවෙන් ප්‍රවාහන පහසුකම්
දිවයින පුරා පිහිටි සියලුම නිදහස් වෙළඳ කලාප නැවත දැනුම් දෙන තුරු වසා දැමීමට කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා අමාත්‍ය ප්‍රසන්න රණතුංග මහතා උපදෙස් දෙයි.
ඇඳිරි නීතිය හේතුවෙන් තවමත් බෝඩිං වල රැදී සිටින එම නිදහස් වෙළද කළාප වල සේවක සේවිකාවන් හමුදාවේ සහ පොලීසියේ අධික්ෂණය යටතේ ඔවුන්ගේ ගම් බිම් වලට යැවීමේ වැඩ පිළිවෙලක් වහාම ක්‍රියාත්මක කරන ලෙස ඇමතිවරයා ආයෝජන මණ්ඩලයට අද (26) උපදෙස් දුන්නේය.
කටුනායක ආයෝජන මණ්ඩලයේදී ඇමති ප්‍රසන්න රණතුංග මහතා සහ ආයෝජන මණ්ඩල ප්‍රධානීන් හා කටුනායක කර්මාන්ත ශාලා හිමිකරුවන්ගේ නියෝජිතයන් අතර පැවැති විශේෂ සාකච්ඡාවේදී ඇමතිවරයා මෙම උපදෙස් ලබා දුන්නේය.
හෙට පෙරවරුවේ සිට පොලීසිය සහ හමුදාවේ මැදිහත් වීමෙන් අදාළ සේවක සේවිකාවන්ට ප්‍රවාහන පහසුකම් සලසන ලෙස ද ඇමතිවරයා මෙහිදී උපදෙස් දුන්නේය.
දැනට බෝඩිං වල රැදී සිටින සේවක සේවිකාවන්ට අද රාත්‍රී අහාරය ලබා දෙන ලෙසත් ඊට අමතරව හෙට ගම් බිම් බලා යන සේවක සේවිකාවන්ට උදෑසන හා දිවා අහාරය ලබා දීමටත් මෙහිදී තීරණය කෙරිණි. ඊට අමතරව සේවක සේවිකාවන් ගම් බිම් බලා පිටත් කර හැරීමට පෙර ඔවුන් විශේෂ සෞඛ්‍ය පරීක්ෂාවකට ලක් කිරීමටද තිරණය විය.
දිවයින පුරා ක්‍රියාත්මක නිදහස් වෙළද කලාප වලින් පිටස්තර ප්‍රදේශ වලින් පැමිණ එම කලාප ආශ්‍රිතව නවාතැන්ගෙන සේවය කරන සේවක සේවිකාවන් බහුලව සිටින්නේ කටුනායක, බියගම සහ වතුපිටිවල යන නිදහස් වෙළද කලාප තුලයි. කටුනායක නිදහස් වෙළද කලාපයේ බොහෝ කර්මාන්ත ශාලා මේ වන විට වසා දමා ඇතැයි ආයෝජන මණ්ඩලයේ úOdhl අධ්‍යක්ෂක එන්.කේ.ඩී ලෝරන්ස් මහතා මෙහිදි කියා සිටියේය.
නිදහස් වෙළද කලාප ආශ්‍රිතව සිටි සේවක සේවිකාවන් බහුතරයක් මේ වන විට නිවෙස් වලට ගොස් ඇති බවත් තවමත් නවාතැන් පොළවල් වල රැදී සිටින්නේ ඉතාමත් සුළු පිරිසක් බවත් අධ්‍යක්ෂක වරයා මෙහිදී කියා සිටියේය. ඇමති ප්‍රසන්න රණතුංග මහතා මෙහිදී අවOdරණය කළේ සංඛ්‍යාව සුළු වුවවත් ඔවුන් වහා නිවෙස් වලට යැවීමට කටයුතු කල යුතු බවයි. ඒ මොහොතේම ජනාධිපති ගෝඨාභය රාජපක්ෂ මහතාට දුරකථනයෙන් ඇමතූ ඇමති ප්‍රසන්න රණතුංග මහතා පවතින තත්ත්වය පැහැදිලි කර අතර තවමත් නවාතැන් පොළ වල රැදී සිටින සේවක සේවිකාවන් ඔවුන්ගේ ගම් බිම් බලා යැවීම සදහා ආරක්ෂක අංශවල සහාය ලබා දෙන ලෙස ඉල්ලා සිටියේය. ඊට ජනාධිපති වරයාගේ එකඟත්වය පළ විය.
ප්‍රදේශයේ පොලීසිය මගින් සේවක සේවිකාවන්ට ගම්බිම් බලා යාමට අදාල බස්රථ පිටත්වන වේලාවන් නිවේදනය කරන ලෙසත් ඒ අනුව ආරක්ෂාකාරී ලෙස ඔවුන් ගම්බිම් වලට පිටත් කර හරින ලෙසත් ඇමතිවරයා මෙහිදී වැඩිදුරටත් ආයෝජන මණ්ඩල ප්‍රධානීන්ට උපදෙස් දුන්නේය. දැනට කටුනායක නිදහස් වෙළ කලාපය ආශ්‍රිතව රැදී සිටින මෙම සේවක සේවිකාවන්ට අවශ්‍ය පහසුකම් සැලසීම සදහා එම වෙළද කලාපයේ කර්මාන්ත හිමියන් රුපියල් ලක්ෂ 5ක මුදලක් ඒ මොහොතේදීම පරිත්‍යාග කළේය.
සාකච්ඡාවෙන් අනතුරුව මාධ්‍යවේදීන් නැගූ ප්‍රශ්න වලට පිළිතුරු දුන් ඇමති ප්‍රසන්න රණතුංග මහතා සදහන් කළේ ජනාධිපති ගෝඨාභය රාජපක්ෂ මහතාගේ උපදෙස් අනුව මෙම පියවර ගත් බවයි. කටුනායක නිදහස් වෙළද කළාපයේ සේවක සේවිකාවන් 20,000ක් පමණ නවාතැන් පොළ වල සිරවී ඇතැයි ජනතා විමුක්ති පෙරමුණ කල ප්‍රකාශය සම්බන්ධයෙන් මාධ්‍යවේදීන් මෙහිදී ඇමතිවරයාගෙන් ප්‍රශ්න කළේය. ඊට ප්‍රතිචාර දැක්වූ ඇමතිවරයා සඳහන් කළේ එපමණ සංඛ්‍යාවක් කටුනායක රැදී සිටියේ නම් නගරයේ ඇදිරි නීතිය ක්‍රියාත්මක කිරීමට අසීරුවනු ඇතැයි කීවේය. ආයෝජන මණ්ඩල නිලධාරීන්ගේ සංඛ්‍යා ලේඛණ අනුව එලෙස රැදී සිටින සංඛ්‍යාව සුළු පිරිසක් වන බවත් ඔවුන්ට හෙට ගම් බිම් බලා යාමට සියලු පහසුකම් සලසන බවත් ඇමති ප්‍රසන්න රණතුංග මහතා කියා සිටියේය.
මේ අතර ආයෝජන මණ්ඩලය පවසන්නේ පහත සදහන් දුරකථන අංක ඇමතීමෙන් අදාළ ප්‍රවාහන පහසුකම් ලබාගත හැකි වේලාවන් පිළිබදව ගම්බිම් බලා යාමට නොහැකිව සිටින වෙළද කලාප සේවක සේවිකාවන්ට තොරතුරු ලබා ගත හැකි බවයි.
කටුනායක :- අධ්‍යක්ෂක, සිසිල් ප්‍රනාන්දු මහතා - 0777-986474
වතුපිටිවල / මීරිගම /
මල්වත්ත නිදහස් වෙළද - අධ්‍යක්ෂක, ඩී.එම් තිලකරත්න මහතා - 0777-808637කලාප
බියගම :- අධ්‍යක්ෂිකා, කල්‍යානි බොතේජු මහත්මිය- 0777-807662
කොග්ගල :- අධ්‍යක්ෂක, ගාමිනි දහනායක මහතා - 077-3140200
හොරණ :- අධ්‍යක්ෂක, දර්ෂන වල්පිට මහතා -076-0387820
සීතාවක :- අධ්‍යක්ෂක, නිහාල් කුමාර පීරි මහතා - 0777-808756
මාවතගම / පොල්ගහවෙල :- අධ්‍යක්ෂක, නොයෙල් දාබරේ මහතා - 0777-809102
නුවර :- අධ්‍යක්ෂක, ජයලත් මොහොට්ටාල මහතා -0777-808291
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
