නෙදර්ලන්තය මුඛ ආවරණ නීතිය තවදුරටත් දැඩි කරයි

දෙවැනි කොරෝනා වෛරසය රැල්ල පාලනය කිරීම සඳහා විවිධ ක්‍රියාමාර්ග හඳුන්වා දෙන බැවින්, නෙදර්ලන්තයේ බොහෝ පදිංචිකරුවන්ට ප්‍රථම වරට සාප්පු සංකීර්ණයන් හිදී මුඛ ආවරණයක් පැලඳීමට උපදෙස් ලබාදී තිබේ.

අසල්වැසියන් යුරෝපා රාජ්‍යයන් හා සසඳන විට නෙදර්ලන්තය බොහෝ දුරට මේ දක්වා දැඩි සීමාවන් රට තුළ ක්‍රියාත්මක නොකළේය.

මිලියන 17ක ජනතාවක් සිටින නෙදර්ලන්තය තුළ මේ සතියේ දිනකට ආසාදන 3,000කට ආසන්න සංඛ්‍යාවක් වාර්තා වී ඇති අතර, නව පියවර අද දිනයේ සිට ආරම්භ වන අතර අවම වශයෙන් සති තුනක්වත් පවතිනු ඇති බව කියයි.

"අපි අපේ උපරිමය කරනවා, නමුත් වෛරසය ඊට වඩා හොඳින් ක්‍රියාත්මක වෙනවා" යැයි සෞඛ්‍ය අමාත්‍ය හියුගෝ ද ජොං සඳුදා පිළිගත්තේය.

රූපවාහිනී සාකච්ඡාවකදී නෙදර්ලන්ත අගමැති මාක් රූට් කියා සිටියේ, රටේ විශාලතම නගර තුන වන ඇම්ස්ටර්ඩෑම්, රොටර්ඩෑම් සහ හේග් යන ප්‍රදේශවල තත්ත්වය බරපතල වී ඇති බවත් හදිසි පියවර අවශ්‍ය බවත් ය.