තේ වගාකරුවන්ට විශ්‍රාම වැටුපක් ගැන සාකච්ඡා

මහා භාණ්ඩාගාරය සමග සාකච්ඡා කර තේ වගා කරන අයටත් විශ්‍රාම වැටුපක් ලබා දීමට ක්‍රමවේදයක් සකස් කරන බව වැවිලි කර්මාන්ත හා අපනයන කෘෂිකර්ම අමාත්‍ය රමේෂ් පතිරණ මහතා පවසයි.

“රටේ ආර්ථිකයට විශාල දායකත්වයක් තේවලින් ලබා ගත්තා. අද තේ ආදායම අඩුවී තිබෙනවා. කුඩා තේ වතු හිමියන් තමයි තේ වගාවට සියයට 70 ක් පමණ දායක වෙන්නේ. තේ වගාකරුවන් ඉල්ලීම් කරනවා ඒ අයටත් විශ්‍රාම වැටුපක් දෙන්න කියලා.

කිසියම් දායක මුදලක් තේ දළු විකුණන විට අරගෙන විශ්‍රාම වැටුපක් ලබාදෙන ලෙසට අද දින ගාල්ල දිස්ත්‍රික්කයේ කුඩා තේ වතු හිමියන්ගේ සංවිධානය ද යෝජනාවක් ඉදිරිපත් කළා. එය ඉතා වැදගත් යෝජනාවක්. එම යෝජනාව ගැන රජයේ අවධානය යොමු කරනවා.” යැයි ඔහු පැවැසීය.

ඊයේ (07දා) ගාල්ල දී පැවති කුඩා තේ වතු හිමියන්ගේ රැස්වීමකදී මේ බව පැවැසීය.

“තේ වගාව දියුණු කළ යුතු තත්ත්වයකයි තිබෙන්නේ. මෙම වගාවට අලුතින් අය එකතු වෙන්නෙත් නැහැ. ඉන්න අය රැදී සිටින්නේත් නැහැ. පැරණි තේ ගස්වලින් දළු ටික කඩා ගන්නවා මිස පාළු සිටුවීමවත් කරන්නේ නැහැ.

තේ පැළ ලක්ෂ පනහක් සිටුවීමට වැඩපිළිවෙලක් ක්‍රියාත්මක කරනවා. පැළ නොමිලේ ලබා දෙනවා. තේ වගාවන් සමග ගම්මිරිස් ,කුරුඳු වැනි බෝග වවන්න උනන්දු වෙන්න. මෙහි වගා කළ හැකි කිසි භෝගයක් පිටරටින් ගෙන්වීම තහනම් කර භෝග වගාවන් සඳහා උනන්දු කරවීමට කටයුතු කරනවා. ගම්මිරිස් අපට අවශ්‍ය තරම් මෙහි වගා කර පිටරටටත් පැටවිය හැකියි.

කුරුඳුත් එහෙමයි. ඇතැම් දේශපාලඥන් කිහිප දෙනෙක් බාල ගම්මිරිස් පිටරටින් ගෙන්වා අපේ ගම්මිරිස් සමග කවලම් කර විකුණනවා. අප ඒ කටයුත්ත නතර කළා. රුපියල් 450 ට තිබුණ ගම්මිරිස් කිලෝව රුපියල් 900 දක්වා ඉහළ ගිහින්.”

හිනිඳුම රවීන්ද්‍ර ශ්‍රී ලාල්