ජීනා මැඩම්ට කොළඹ මහාධිකරණය දුන් දඬුවම

ගණිකාවන් බවට පත් කිරීම සදහා කාන්තාවන් පස්දෙනෙකු රදවාගෙන සිටීමේ චෝදනාවට වරද පිළිගත් ‘ජිනා මැඩම්’ නමැත්තියට කොළඹ මහාධිකරණ විනිසුරු ධම්මික ගනේපොල මහතා අද (19) අත්හිටවු සිරදඩුවම් හා දඩ නියම කළේය.

විත්තිකාරියට බරපතල වැඩ සහිත වසර 02ක සිරදඩුවමක් නියම කොට එය වසර 10 ක කාලයකට අත්හිටුවීමට නියම කළ විනිසුරුවරයා එම වසර 10ක කාලය තුළ මෙවැනි ආකාරයේ වරදක් කරනු ලැබුවහොත් මෙම වසර 02ක බරපතල වැඩ සහිත සිරදඩුවම ක‍්‍රියාත්මක කිරීමටද නියම කළේය.

චෝදනාවට වරද පිළිගැනීම නිසා මෙලෙස දඩුවම් නියම වුයේ රෝස්මෙරි ජූඩ් ෆිලීෂියා පෙරේරා හෙවත් ජිනා මැඩම් නැමැත්තියටය.

2010 වසරේදී කොළඹ කොල්ලුපිටිය ප්‍රදේශයේ ගණිකා වෘත්තියේ යෙදවීම සඳහා කාන්තාවන් පස්දෙනෙකු රඳවා ගැනීම සහ ඔවුන් කූට්ටනය කිරීම ඇතුළු චෝදනා පහක් යටතේ විත්තිකාරියට එරෙහිව නීතිපතිවරයා නඩු පවරා තිබිණි.

මෙම නඩුව කැදවනු ලැබු අවස්ථාවේදී අධිකරණයේ පෙනී සිටි විත්තිකාරිය අදාළ චෝදනාවන්ට තමන් වරද පිළිගන්නා බව දැනුම් දුන්නාය.

විත්තිකාරිය වෙනුවෙන් පෙනී සිටි නීතීඥවරයා කරුණු ඉදිරිපත් කරමින් මෙම නඩුව විභාගයට නොගොස් තම සේවාදායිකාව චෝදනාවන්ට වරද පිළිගන්නා හෙයින් ඇයට ලිහිල් ආකාරයෙන් දඩුවම් නියම කරන්නැයි ඉල්ලා සිටියාය.

ඉදිරිපත් වු කරුණු සළකා බැලීමෙන් අනතුරුව විත්තිකාරියට බරපතල වැඩ සහිත වසර 02ක සිරදඩුවමක් නියම කොට එය වසර 10 ක කාලයකට අත්හිටුවීමට නියම කළ විනිසුරුවරයා රුපියල් ලක්‍ෂ 05ක දඩයක්ද ඇයට නියම කළේය.