ජනපති කී දෙයක් එස්බී කියයි

ශ්‍රී ලංකා පොදුජන පෙරමුණේ පක්ෂ සම්මේලනයට නොයන ලෙස ජනපති මෛත්‍රීපාල සිරිසේන මහතා ඉල්ලීමක් කළ බව පාර්ලිමේන්තු මන්ත්‍රී එස්. බී. දිසානායක මහතා පැවැසීය.

ශ්‍රී ලංකා පොදුජන පෙරමුණේ පක්ෂ සාමාජිකත්වය ලබා ගැනීමෙන් අනතුරුව ඔහු මේ බව ප්‍රකාශ කළේය.

“ පක්ෂය මෛතී‍්‍රපාල සිරිසේන ජනාධිපතිවරයාට භාරදීමත්, එක්සත් ජාතික පක්ෂය සමඟ හවුල් ආණ්ඩුවකට යාමත් යන සිදුවීම් නිසා අපි මහත් වියවුලකට පත්වුණා.

අපි ආණ්ඩුවට එරෙහි විශ්වාසභංගයක් ඉදිරිපත් කරා. ඒ විශ්වාසභංග යෝජනාව ඉදිරිපත් කළේ ඒකාබද්ධ විපක්ෂයත් සමඟ ඉඳලායි. විශ්වාසභංග යෝජනාව පටන් ගත්ත තැන සිටම මෛත‍්‍රීපාල සිරිසේන ජනාධිපතිවරයා අපට උදව් කළා.

නමුත් අවසාන මොහොතේ පක්ෂය තීන්දුවක් ගත්තා. විශ්වාසභංග යෝජනාවට ඡන්දය දීමෙන් වැළකී සිටීම තමයි ඔවුන් ගත් තින්දුව.  විශ්වාසභංග යෝජනාව හදන්න මූලිකත්වය ගත්ත මන්ත‍්‍රීවරු විදිහට අපි විශ්වාස භංග යෝජනාවට ඡන්දය දීලා ආණ්ඩුවෙන් ඉවත් වෙන්න තීරණය කළා.

ඒ අවස්ථාවේ අපි දහසය දෙනෙක් ඒ තීරණයේ හිටියා. නමුත් පහුවදා දයාසිරි ජයසේකර ඇමතිවරයා නැවත ගියා.  එතුමා ආණ්ඩුවට එකතු වෙන්න උත්සාහ කළ ද රනිල් වික‍්‍රමසිංහ මහතාගේ විරෝධතාවය නිසා ඒ උත්සාහය වැළකුණා.

අතිගරු ජනාධිපතිතුමා අපෙන් ඉල්ලීමක් කලා ශ‍්‍රී ලංකා පොදුජන පෙරමුණ පක්ෂ සම්මේලනයට නොගිහින් හිටියොත් හොඳයි කියලා.

කවුරු කොයි විදියට ශී‍්‍ර ලංකා නිදහස් පක්ෂය,  සජිත් පිලේ එල්ලෙන්න හැදුවත් කරු ජයසූරියගේ එල්ලන්න හැදුවත් අවසානයේ ජනාධිපති මෛත‍්‍රීපාල සිරිසේන මහතා ඇවිත් ගෝඨාභය රාජපක්ෂ මහතා සමඟ හිටගෙන ගෝඨාභය රාජපක්ෂ මහතා ජයග‍්‍රහණය කරනවා.”