චීනයෙන් තව එන්නත් මාත්‍රා මිලියන 100ක පරිත්‍යාගයක්

චීනය මේ වසරේදී සංවර්ධනය වෙමින් පවතින රටවලට අතිරේකව තවත් කොවිඩ්-19 එන්නත් මාත්‍රා මිලියන 100ක් පරිත්‍යාග කරන බව චීන ජනාධිපති ෂී ජින්පිං 13 වැනි බ්‍රික්ස් සමුළුවේදී ප්‍රතිඥා දුන්නේය.

ලෝක සෞඛ්‍ය සංවිධානය විසින් ආරම්භ කරන ලද ගෝලීය එන්නත් බෙදාගැනීමේ යෝජනා ක්‍රමය වන කොවැක්ස් සඳහා මේ වසර පුරා කොවිඩ්-19 එන්නත් මාත්‍රාවන් බිලියන 2ක් ලබාදෙන බවට හා ඩොලර් මිලියන 100ක් පිරිනමන බවට චීනය පසුගිය මාසයේ පොරොන්දු විය. කොවැක්ස් අරමුදල ප්‍රධාන වශයෙන් සංවර්ධනය වෙමින් පවතින රටවලට එන්නත් මාත්‍රා බෙදා හැරීම සඳහා කටයුතු කෙරෙයි.

මේ දක්වා චීනය විසින් රටවල් සහ ජාත්‍යන්තර සංවිධාන 100කට අධික සංඛ්‍යාවකට කොවිඩ්-19 එන්නත් මාත්‍රා බිලියන 1කට වඩා ලබා දී ඇත. මෙම වසර අවසානය වනවිට බිලියන 2ක එන්නත් මාත්‍රා පොරොන්දු ඉටු කිරීමට චීන රජය උත්සාහ කරන අතර, සෑම දෙනාටම සමාන ප්‍රවේශයකින් ලබාගත හැකි එන්නත් පිළිබඳ ජාත්‍යන්තර සහයෝගීතාව ශක්තිමත් කරන ලෙස ජනපති ෂී වැඩිදුරටත් ඉල්ලා සිටියේය.

මේ වන විටත්, කොරෝනා වසංගතය ලොව පුරා විනාශකාරී ලෙස සිදු වෙමින් පවතී. එහි ප්‍රතිඵලයක් වශයෙන් ගෝලීය වශයෙන් සුවය ලබාගැනීමේ මාවතද බාධාවන් මැද ගමන් කරන අතර, මෙවැනි පසුබිමක මානව වර්ගයා සඳහා ඒකාබද්ධ අනාගතයක් ඇති ප්‍රජාවක් ගොඩනැගීම සඳහා බ්‍රික්ස් රටවල් ඉදිරියට ගෙන යන ලෙසද ජනපති ෂී ඉල්ලා සිටියේය.

"අපි කොවිඩ්-19 ට එරෙහිව ගෝලීය සහයෝගීතාව ප්‍රවර්‍ධනය කළ යුතු අතර, වසංගතය මැඩපැවැත්වීමට සහ එහි මූලාරම්භය සෙවීම සඳහා විද්‍යාව පදනම් කරගත් ප්‍රවේශයක් තහවුරු කර ගැනීමටත්, දේශපාලනීකරණය හා අපකීර්තියට එරෙහි වීමටත් කටයුතු කළ යුතුයි" ඔහු පැවසීය.

ගෝලීය මහජන යහපතක් ලෙස කොවිඩ් වැළැක්වීම, පාලනය කිරීම, පර්යේෂණ වැඩි කිරීම, නිෂ්පාදනය කිරීම සහ සාධාරණ ලෙස බෙදා හැරීම සම්බන්ධීකරණය වැඩි දියුණු කළ යුතු බවද ජනාධිපතිවරයා පැවසීය.

සහෝදරත්වයේ හැඟීමෙන් මහජන සෞඛ්‍ය සහයෝගීතාව ශක්තිමත් කරන ලෙසත්, දේශපාලන වගකීම ඉහළ නංවන ලෙසත්, එකිනෙකාගේ කොවිඩ්-19 ප්‍රතිචාරයට සහයෝගය දක්වන ලෙසත්, අදාළ තොරතුරු සහ කොවිඩ්-19 පාලන අත්දැකීම් හුවමාරු කර ගන්නා ලෙසත් ඔහු බ්‍රික්ස් රටවලින් ඉල්ලා සිටියේය.

බ්‍රික්ස් රටවල් අතර එන්නත් පිළිබඳ ප්‍රායෝගික සහයෝගීතාව අවශ්‍ය බවත්, ඒකාබද්ධ පර්යේෂණ හා නිෂ්පාදනය සහ අන්‍යෝන්‍ය පිළිගැනීම් ප්‍රමිති හඳුනා ගැනීමත්, බ්‍රික්ස් එන්නත පර්යේෂණ හා සංවර්ධන මධ්‍යස්ථානය අතථ්‍ය ස්වරූපයෙන් ඉක්මනින් ආරම්භ කිරීමට පහසුකම් සැලසීමත් අවශ්‍ය බව ෂී ජනාධිපතිවරයා පැවසීය.

වෛරසයට එරෙහිව මෙවලම් වැඩි දියුණු කිරීම සඳහා සාම්ප්‍රදායික වෛද්‍ය විද්‍යාව පිළිබඳ සහයෝගීතාව ශක්තිමත් කිරීම අත්‍යවශ්‍ය බවද ඔහු සඳහන් කළේය.