චන්ද්‍ර අලුත් අවුරුදු නිවාඩුවට ද.කොරියාවේ නීති දැඩි කරයි

චන්ද්‍ර අලුත් අවුරුදු නිවාඩුව අවසන් වන තෙක් දකුණු කොරියාව සිය සමාජ දුරස්ථ පියවර තවත් සති දෙකක් සඳහා දීර්ඝ කරන බව අගමැති චුන්ග් සයි-කියුන් රූපවාහිනිය ඔස්සේ ප්‍රකාශයක් කරමින් කියා සිටියේය.

මෙම තීරණය සැහැල්ලුවට නොගන්නා ලෙසත්, ව්‍යාපාරිකයන්ගෙන් සමාව ඉල්ලා සිටින බවත් පැවසූ අගමැතිවරයා, පෙබරවාරි 11 සිට පෙබරවාරි 13 දක්වා එලැඹෙන නිවාඩු දිනවල දැඩි නීති රීති පිළිපැදීමේ වැදගත්කම අවධාරණය කළේය.

සෝල් අගනුවර ප්‍රදේශය මේ වනවිට 2.5 මට්ටමේ (දෙවැනි ඉහළම මට්ටමේ) සමාජ දුරස්ථ සීමා කිරීම් පවතින අතර, රටේ සෙසු ප්‍රදේශවල 2 මට්ටමේ සීමා කිරීම් පවතී.

වර්තමාන නීතිරීතිවලට අනුව, සෝල් සහ අවට ප්‍රදේශවල අවන්හල් රාත්‍රී 9 න් පසු ආහාර රැගෙන යාමට සහ බෙදා හැරීමේ ඇණවුම් ලබා ගැනීමට පමණක් අවසර දී ඇති අතර, ක්‍රීඩා ඉසව් ප්‍රේක්ෂකයින්ට තහනම් කර ඇත.

ආසාදන අනුපාතය ස්ථාවර කිරීමෙන් හැකි ඉක්මනින් සාමාන්‍ය දෛනික ජීවිතය යථා තත්ත්වයට පත් කිරීමට රජය කැපවී සිටින බව අග්‍රාමාත්‍යවරයා අවධාරණය කළේය.