ගුවන්තොටුපල විවෘත කර සංචාරකයන් සදහා රට විවෘත කිරීමට සියල්ල සුදානම්

ගුවන්තොටුපල විවෘත කර සංචාරකයන් සදහා රට විවෘත කිරීමට සියල්ල සුදානම් බව සංචාරක ඇමති ප්‍රසන්න රණතුංග අවධාරණය කරයි. සෞඛ්‍ය බලධාරීන් සමග මේ සම්බන්ධයෙන් පවතින සාකච්ඡා අවසන් අදියරේ පවතින බවද ඔහු පෙන්වා දෙයි.

මෙරට ගුවන් මෙහෙයුම් වල නිරත වන ගුවන්සේවා නියෝජිතයන් හා ඇමතිවරයා අතර අද (10) පැවති විශේෂ සාකච්ඡාවකදී ඇමතිවරයා මේ බව දැනුම් දුන්නේය. මෙම සාකච්ඡාව ලෝක වෙළද මධ්‍යස්ථානයේ පිහිටි සංචාරක අමාත්‍ය කාර්යාලයේදි පැවැත්විණ. ගුවන්තොටුපල හා ගුවන්සේවා සමාගම, සිවිල් ගුවන්සේවා අධිකාරිය හා සංචාරක සංවර්ධන අධිකාරියේ නිලධාරීන්ගේ ප්‍රධානත්වයෙන් පැවැත්විණ.

ගුවන්තොටුපල හා රට කඩිනමින් සංචාරකයන්ට විවෘත කිරීමට අපේක්ෂා කරන බැවින් ඒ සදහා සුදානම් වන ලෙසද ඇමතිවරයා මෙහිදි ගුවන්සේවා නියෝජිතයන්ට දැනුම් දුන්නේය. ගුවන්සේවා සමාගමේ නියෝජිතයන් මෙහිදි කියා සිටියේ ශ්‍රී ලංකාවට නැවත ගුවන් ගමන් ආරම්භ කිරීමට සුදානම් බවයි. සෞඛ්‍ය ආරක්ෂිතව සංචාරකයන් මෙරටට ගෙන ඒමට සුදානම් බවද ඔවුන් කියා සිටියහ.

ඇමති ප්‍රසන්න රණතුංග  මෙහිදි ආවධාරණය කලේ සංචාරකයන්ට රට විවෘත කලද මෙරට වැසියන්ගේ ආරක්ෂාව පිළිබදව රජය දැඩි ලෙස සැලකිලිමත් වන බවයි. ඒ නිසා නිසි සෞඛ්‍ය මාර්ගෝපදේශ ක්‍රියාත්මක කරමින් සංචාරකයන්ට රට විවෘත කිරීම සිදු කල යුතු බව ඇමතිවරයා අවධාරනය කලේය. ගුවන්තොටුපල හා සංචාරකයන්ට රට විවෘත කිරීමෙන් පසු ඒ සම්බන්ධයෙන් අනුගමනය කළ යුතු ක්‍රම වේදය පිළිබද මෙහිදි දීර්ඝ ලෙස සාකච්ඡා කෙරිණ.

මෙහිදි ඇමතිවරයා අවධාරනය කලේ සංචාරකයන් දිවයිනට පැමිණි පසු ඔවුන් රැදී සිටින හෝටල් සහ වාසස්ථාන සෞඛ්‍ය මාර්ගෝපදේශ දැඩි ලෙස අනුගමනය කළ යුතු බවයි. එලෙස සෞඛ්‍ය මාර්ගෝපදේශ දැඩි ලෙස අනුගමනය නොකරන හෝටල් සහ වාසස්ථාන අසාදු ලේඛණ ගත කරන බවද ඇමතිවරයා කිවේය. සංචාරකයන් රදවා ගැනීමට අපේක්ෂා කරන හෝටල් හා වාසස්ථාන සෞඛ්‍ය මාර්ගෝපදේශ අනුගමනය කරන බවට සහතිකයකයක් ලබා ගැනීම අනිවාර්යය කර තිබේ. එම සහතිකය සංචාරක සංවර්ධන අධිකාරිය මගින් ලබා ගත හැකිය එය සංචාරක සංවර්ධන අධිකාරිය මගින් ලබා දෙන්නේ සම්පූර්ණයෙන්ම නොමිලේයි. ඊට අදාල අයදුම්පත් ඔන්ලයින් තාක්ෂණය ඔස්සේ තවමත් භාර ගන්නා බවද මෙහිදි අවදාරණය කෙරිණ.