ගංවතුරට තෙල් මිශ්‍ර වීමෙන් පීඩාවට පත් ජනතාවට වන්දි

පසුගියදා ඇද හැලුනු අධික වර්ෂාපතනය හේතුවෙන් සපුගස්කන්ද තෙල් පිරිපහදුවේ බිම් මට්ටමේ පිහිටි ජලය මිශ්‍රිත තෙල් පවිත්‍රාගාරයකින් ගංවතුරට තෙල්  මිශ්‍රවීමෙන් පීඩාවට පත් ජනතාවට කඩිනමින් වන්දි ලබාදීම සඳහා බලශක්ති අමාත්‍ය නීතිඥ උදය ගම්මන්පිල මහතා විසින් පත් කළ වන්දි කමිටුවේ වාර්තාව එහි සභාපති බී.ටී.ටී. පෙරේරා මහත්මිය සහ කමිටු සාමාජික තාරක වේරගොඩ මහතා විසින් අමාත්‍යවරයා වෙත 2021.06.21 දින භාර දෙන ලදී.

වන්දි ගෙවීමට පත් කළ ත්‍රි පුද්ගල කමිටුව මාබිම,  වලහේන,  පට්ටිවිල යන ප්‍රදේශ වල තෙල් ගංවතුර හා මුසු වීමෙන් නිවාස හා දේපල, ගෙවතු වගාවන්, ජල මූලාශ්‍ර යනාදියට  සිදු වූ හානිය පිළිබඳව නිරීක්ෂණ කටයුතු සිදු කරන ලදී. එමෙන්ම මෙම සිද්ධියෙන් පීඩාවට පත් පුද්ගලයන් තමන්ට  සිදුවී ඇති හානි  පිළිබද විස්තර කමිටුව වෙත ලිඛිතව භාර දෙන ලදී.

මේ සියලු විස්තර සවිස්තරාත්මකව නිරීක්ෂණය කර සමාලෝචනය කිරීමෙන් අනතුරුව පුද්ගලයන් 45 දෙනෙකුට රුපියල් 1,933,000.00ක මුදලක් වන්දි වශයෙන් ලබාදීමට වන්දි කමිටුව විසින් නිර්දේශ කර ඇත.