කොරෝනා තුළින් යළි ජිවිතය ගොඩනැගිම ගැනයි සිතිය යුත්තේ - නාමල්

කොරෝනා නිසා ගෙවල් අස්සටවෙලා සිටිය නොහැකි බවත්, කොරෝනා තුළ ජීවිතය යළිත් ගොඩනගන්නෙ කොහොමද කියන එක ගැන සාකච්ඡා කළ යුතු යැයි හිටපු පාර්ලිමේන්තු මන්ත්‍රී නාමල් රාජපක්ෂ මහතා පවසයි.

නාමල් රාජපක්ෂ මහතා මෙසේ පැවසූයේ අද (20) තංගල්ල කාර්ල්ටන් නිවසේදි මාධ්‍යවේදීන් අමතමිනි.

හිටපු මන්ත්‍රීවරයා මෙසේද පැවසුවේය,

ලෝක සෞඛ්‍ය සංවිධානය කියන විදියට තව වසර ගණනාවක් කොරෝනා වෛරසය මේ ලෝකය ඇතුළේ පවතිනවා. මෙයට බෙහෙතක් සොයාගන්නකල් හෝ ඇඟ තුළම ප්‍රතිශක්තීකරණය ගොඩනැගෙනකල් මේ අභියෝගයට අපි මුහුණ දෙන්න සිදුවෙනවා.

කොරෝනා නිසා ගෙවල් අස්සටවෙලා හැංඟිලා ඉන්න බැහැ. කර්මාන්තශාලා වහල තියන්න බැහැ. ගුවන්තොටුපොළවල් වහල තියන්න බැහැ. කොරෝනා තුළ ජීවිතය යළි ගොඩනඟන්නෙ කොහොමද කියන එක ගැන අපි සාකච්ඡා කරන්න ඕනෑ. ජන ජීවිතය යථා තත්ත්වයට ගේන්නෙ කොහොමද, පාසල් විවෘත කරන්නෙ කොහොමද, ක්‍රීඩා පවත්වන්නේ කොහොමද කියන දේ සිතන්න ඕනෑ. යම්තාක්දුරට තනිව කරන්න පුළුවන් ක්‍රීඩා කළ හැකි පරිසරයක් දැන් නිර්මාණය වී තිබෙනවා. ඉදිරි කාලයේදී මේ දේවල් ලිහිල් කිරීම තුළින් අපි බලාපොරොත්තු වෙනවා නැවතත් සෞඛ්‍ය සම්පන්න සමාජයක් ගොඩනඟන්න ඕනෑ තැනට මේ රට ගෙනියන්න පුළුවන්.

මේ රටේ ජන ජීවිතය සාමාන්‍ය තත්ත්වයට පත්වෙනවා වගේම රටේ ප්‍රජාතන්ත්‍රවාදය ආරක්ෂා කළ යුතුයි. එය ආරක්ෂා කිරීමේ ක්‍රමවේදය තමයි මැතිවරණය පැවැත්වීම. අපි විශ්වාස කරනවා වැඩිකල් යන්න කලින් මැතිවරණය පවත්වන්න පුළුවන්. ස්ථාවර ආණ්ඩුවක් නැති හැම මොහොතකම මේ රට කඩාගෙන වැටුණ එකයි පසුගිය අවුරුදු පහේ ඉතිහාසයේ අපි දැක්කේ.  ශක්තිමත් පාර්ලිමේන්තුවක් මෙන්ම ස්ථාවර ආණ්ඩුවක් හදන්න ඕනෑ යැයිද පැවසීය.

අනිෂා මානගේ