කෝටියකට අධික මත්කුඩු සමග දෙදෙනෙක් අත්අඩංගුවට

මෝටර් රථයකින් ප්‍රවාහනය කරමින් සිටි රුපියල් කෝටියකට අධික වටිනා හොරොයින්  මත්කුඩු තොගයක් සමග කාන්තාවක් සහ පිරිමි පුද්ගලයෙක් බෙල්ලන්විල ප්‍රදේශයේදි අත්අඩංගුවට ගත් බව බොරලැස්ගමුව පොලීසිය කියයි.

මෙම සැකකරුවන් සන්තකයේ මත්කුඩු කිලෝ එකයි ග්‍රෑම් සීයකට අධික ප්‍රමාණයක්  සොයාගෙන ඇත.

බෙල්ලන්විල  ප්‍රදේශයේ පුද්ගලයකුට ලබාදීම සඳහා රාජගිරිය ප්‍රදේශයේ සිට මෝටර් රථයකින් මත්කුඩු රැගෙන එන බවට පොලීසියට ලද තොරතුරක් අනුව සැකකරුවන් අත්අඩංගුවට ගත් බව පොලිසිය කියයි.

අත්අඩංගුවට පත් සැකකරුවන්ගෙන් සිදු කළ ප්‍රශ්න  කිරීමේ දී මෙම මත්කුඩු විදේශගතව සිටින මහාපරිමාණ මත්ද්‍රව්‍ය ජාවාරම්කරුවෙක් වන ශිරාන් බාසික් නැමැත්තාට අයත් ඒවා බවට අනාවරණ වූ බව පොලිස් නිලධාරියකු පැවැසීය.

අත්අඩංගුවට ගත් සැකකාරිය රත්මලාන ප්‍රදේශයේ පදිංචි වයස අවුරුදු 34 ක තැනැත්තියකි.

අනෙක් සැකකරු රාජගිරිය ප්‍රදේශයේ පදිංචි වයස අවුරුදු තිහක තැනැත්තෙකි.

බිමල් ශ්‍යාමන් ජයසිංහ