ඇස්ට්‍රාසෙනෙකා WHO හි හදිසි භාවිතයට පිළිගනියි

ඇස්ට්‍රාසෙනෙකා - ඔක්ස්ෆර්ඩ් කොවිඩ්-19 එන්නත ලෝක සෞඛ්‍ය සංවිධානය විසින් හදිසි භාවිතය සඳහා ලැයිස්තුගත කිරීම ඊයේ (15දා) සිදුවූ අතර, ඉන් අදහස් කරන්නේ එය COVAX හරහා ගෝලීයව බෙදාහැරීමට අවකාශය හිමිවන බවයි.

"වසංගතය පාලනය කර ගැනීමට අපේක්ෂා කළ හැකි බවට අද අපට තවත් හේතු සාධක තිබෙනවා" යැයි ලෝක සෞඛ්‍ය සංවිධානයේ අධ්‍යක්ෂ ජනරාල් ටෙඩ්‍රොස් අද්නාම් ගෙබ්‍රෙයීසස් ඊයේ ජිනීවාහි පැවති ප්‍රවෘත්ති සාකච්ඡාවේදී පැවසීය. "අද, ලෝක සෞඛ්‍ය සංවිධානය ඔක්ස්ෆර්ඩ් - ඇස්ට්‍රාසෙනෙකා එන්නත හදිසි භාවිතයට අනුමත කර තිබෙනවා. ඒ අනුව හදිසි භාවිත ලැයිස්තුවට ඇතුළත් වූ මේ එන්නත් ගෝලීයව COVAX හරහා බෙදාහැරීමට හරිත එළියක් ලබාදී තිබෙනවා."

ටෙඩ්‍රොස් තවදුරටත් පැහැදිලි කළේ මෙම එන්නතෙහි අනුවාදකයන් දෙකම, එනම් ඇස්ට්‍රාසෙනෙකා -එස්කේබයෝ සහ ඉන්දියාවේ සේරම් ආයතනය යන නිෂ්පාදකයන් දෙදෙනා විසින්ම නිපදවන එන්නත, එකම ඇස්ට්‍රාසෙනෙකා එන්නත බවයි.

හදිසි භාවිත ලැයිස්තුගත කිරීම සඳහා කොවිඩ් -19 එන්නත්වල ගුණාත්මකභාවය, ආරක්ෂාව සහ කාර්යක්ෂමතාව තක්සේරු කරන අතර, එම එන්නත් COVAX සැපයුමේ කොටසක් වීම සඳහා එය පූර්ව අවශ්‍යතාවක් වෙයි. එමෙන්ම මේ හරහා රටවල්වලට තමන්ගේම නියාමන අනුමැතිය කඩිනම් කිරීමට ඉඩ සැලසෙන බවද ලෝක සෞඛ්‍ය සංවිධානය පවසයි.

ඇස්ට්‍රාසෙනෙකා - ඔක්ස්ෆර්ඩ් එන්නත් දෙකම (නිෂ්පාදකයන් දෙදෙනාගේ) සඳහා ලෝක සෞඛ්‍ය සංවිධානය විසින් ගුණාත්මකභාවය, ආරක්ෂාව සහ කාර්යක්ෂමතා දත්ත, අවදානම් කළමනාකරණ සැලසුම් සහ වැඩසටහන්මය යෝග්‍යතාවය සති හතරකට අඩු කාලයක් තුළ තක්සේරු කරන ලදී. පෙබරවාරි 8 වැනි දින එන්නත WHO හි ප්‍රතිශක්තිකරණ පිළිබඳ විශේෂඥයන්ගේ කණ්ඩායම (SAGE) විසින් සමාලෝචනය කරන ලද අතර, ඔවුන් එය වයස අවුරුදු 18 සහ ඊට වැඩි සියලුම කණ්ඩායම් සඳහා නිර්දේශ කළේය. එහිදී මාත්‍රාවන් දෙක සති අටක් හෝ 12 ක් අතර කාලයක් තුළ ලබා දෙනු ලැබේ. ඔවුන්ගේ අතුරු නිර්දේශවලින් කියැවෙන්නේ එය රෝග ලක්ෂණ ආසාදනයට එරෙහිව 63.09% ක කාර්යක්ෂමතාවයක් ඇති බවයි.

ෆයිසර් - බයෝඑන්ටෙක් එන්නත සමග ලෝක සෞඛ්‍ය සංවිධානය විසින් හදිසි භාවිත ලැයිස්තුවක් ලබාගන්නා දෙවන හා තෙවැනි එන්නත් මේවා බව ටෙඩ්‍රොස් පැවසීය. බෙදාහැරීම සඳහා අධික සීතල ප්‍රවාහන විධි අවශ්‍ය නොවීම මෙම එන්නත වැඩි ඉල්ලුමක් ඇති කර තිබේ.