ඇස්ට්‍රාසෙනෙකා හි අනුමතය යුරෝපා ඖෂධ ඒජන්සිය දෙයි

යුරෝපා ඖෂධ ඒජන්සිය ඔක්ස්ෆර්ඩ්-ඇස්ට්‍රාසෙනෙකා එන්නත සඳහා කොන්දේසි සහිත වෙළෙඳ පොළ අනුමැතිය නිර්දේශ කර ඇති අතර, මෙම එන්නත වයස අවුරුදු 18ට වැඩි පුද්ගලයන් සඳහා පමණක් භාවිත කළ යුතු බව දන්වා තිබේ.

ඇම්ස්ටර්ඩෑම් හි පිහිටි යුරෝපා ඖෂධ ඒජන්සිය විසින් බ්‍රිතාන්‍ය-ස්වීඩන් සමාගමක් වන ඇස්ට්‍රාසෙනෙකා විසින් නිපදවන ලද එන්නත සඳහා මෙසේ කොන්දේසි සහිත වෙළෙඳ පොළ අවසරයක් නිර්දේශ කර ඇත.

"සායනික අත්හදා බැලීම්වලින් පෙනී ගියේ මෙම එන්නත වයස අවුරුදු 18 ට වැඩි අය වෙනුවෙන් කොවිඩ්-19 වැළැක්වීම සඳහා ආරක්ෂිත සහ ඵලදායී බවයි" එම ඒජන්සිය පවසා තිබේ.

යුරෝපා කොමිසම විසින්ද එන්නත සඳහා විධිමත් අනුමැතිය පැය කිහිපයක් ඇතුළත ලබා දීමට අපේක්ෂා කෙරේ. ඒ අනුව එක්සත් ජනපද-ජර්මානු නිෂ්පාදනයක් වන ෆයිසර්-බයෝඑන්ටෙක් සහ එක්සත් ජනපද සමාගමක් වන මොඩෙර්නා විසින් නිපදවන ලද එන්නත් සමග යුරෝපා කොමිසම විසින් තෙවැනි සහතික කළ එන්නත බවට ඇස්ට්‍රාසෙනෙකා පත්වනු ඇත.

කෙසේ වෙතත් ජර්මනියේ එන්නත් කොමිෂන් සභාව බ්‍රහස්පතින්දා පවසා තිබුණේ වයස අවුරුදු 65 සහ ඊට වැඩි පුද්ගල කාණ්ඩය සඳහා එන්නත් කාර්යක්ෂමතා දත්ත නොමැති බැවින්, එම වයස් කාණ්ඩයට ඇස්ට්‍රාසෙනෙකා මාත්‍රා භාවිත කිරීම නිර්දේශ කළ නොහැකි බවයි.

මෙය වඩාත් අවධානයට යොමුවූයේ සක්‍රීය එන්නත් කිරීමේ වැඩසටහන් ඇති බොහෝ රටවල එන්නත් ලබා දුන් පළමු පුද්ගලයින් අතර වයෝවෘද්ධ වයස් කාණ්ඩ සහ නිධන්ගත රෝග තත්ත්වයන් පවතින අය ප්‍රමුඛතාවක් ලැබූ බැවිනි. කෙසේ වෙතත් යුරෝපය වෙත ප්‍රමාණවත් තරම් එන්නත් මාත්‍රා ලබාදීමට එකඟ වූ පරිදි ඇස්ට්‍රාසෙන්කා අපොහොසත් වීමද මෙම කලකිරීම් සඳහා හේතු වී ඇති බවද විදෙස් වාර්තා පෙන්වා දෙයි. විශේෂයෙන්ම බෙල්ජියම් කර්මාන්ත ශාලාවක නිෂ්පාදන ගැටලු උපුටා දක්වමින් ඇස්ට්‍රාසෙනෙකා යුරෝපා සංගමයට සැපයුම් කප්පාදුවක් ප්‍රකාශයට පත් කිරීමත් සමග පසුගිය සතියේ ජර්මනියේ එන්නත් කිරීමේ ක්‍රියාවලියට දැඩි පහරක් එල්ල විය.