ඇමෙරිකානු කොවිඩ් ආසාදිත ලක්ෂ 13 පනී - මරණ 79,000

ඇමෙරිකා එක්සත් ජනපදයේ කොවිඩ්-19 හෙවත් නව කොරෝනා වෛරසය ආසාදිතයන් ලක්ෂ 13 සීමාව ඉක්මවා ගොස් තිබේ.

ජෝන්ස් හොප්කිනිස් විශ්වවිද්‍යාල දත්තවලට අනුව අද (10දා) අලුයම වනවිට එම අගය දැක්වුණේ 1,309,168ක් ලෙසිනි.

එමෙන්ම මේ දක්වා ඇමෙරිකාවේ කොරෝනා වෛරසය ආසාදිතව සිදුව ඇති මරණ සංඛ්‍යාව 78,794ක් දක්වා ඉහළ ගොස් ඇති අතර, එය ඇමෙරිකාව විසින් මීට පෙර පුරෝකථනයන් අභිභවා යෑමකි.

ඇමෙරිකානු මරණවලින් වැඩිම ප්‍රමාණය නිව්යෝක් ප්‍රාන්තයෙන් වාර්තා වන අතර, එම අගයද 25,000 ඉක්මවා යමින් මේ වනවිට 26,612ක් ලෙස වාර්තා වෙයි.

ඉන් අනනතුරුව පිළිවෙළින් නිව් ජර්සි ප්‍රාන්තයේ මරණ 9,116ක්, මැසචුසෙට්ස් ප්‍රාන්තයේ මරණ 4,840ක්, මිචිගන් ප්‍රාන්තයේ මරණ 4,530ක්, පෙන්සිල්වේනියා ප්‍රාන්තයේ මරණ 3,779ක්, ඉලිනොයිස් ප්‍රාන්තයේ මරණ 3,349ක් ලෙස වාර්තා වෙයි.

ඇමෙරිකාවේ සමස්ත ආසාදිතයන්ගෙන් මෙතෙක් සුවය ලබා ඇත්තේ පුද්ගලයන් 212,534ක් පමණි.

කොවිඩ්-19 පරීක්ෂණය කිරීමෙන් පමණක් වෛරසය පාලනය කළ හැකි බව විශ්වාස කරන ඇමෙරිකාව මේ වනවිට පරීක්ෂණ 8,709,630ක් සිදුකර ඇත.