ආමි ශිවා ගිනි අවි සමග අලුත්ගමදී අත්අඩංගුවට

සංවිධානාත්මක අපරාධ කල්ලි නායක මාකදුරේ මධූෂ් නමැත්තාගේ සමීපතම ගෝලයකු වූ පාදාගොඩ ආමි ශිවා නමින් හදුන්වන සැකකාර විශ්‍රාමික හමුදා සැරයන් මේජර්වරයකු නීති විරෝධි ගිනි අවි ,අත් බෝම්බ ඇතුලු රජයේ ආරක්ෂක හමුදාවට අයත් උපකරණ සමග අද (17) සවස අලුත්ගම පාදාගොඩදී කලුතර කොට්ඨාස විෂ මත්ද්‍රව්‍ය ඒකකයේ නිලධාරීන් කණ්ඩායමක් විසින් අත්අඩංගුවට ගත් බව කියයි .

මෙයට සති කිහිපයකට පෙර අත්අඩංගුවට පත් මාකදුරේ මධූෂ් නමැත්තාගේ මත් ද්‍රව්‍ය ජාවාරම් සම්භන්ද ගෝලයකු වූ පාදාගොඩ බුෂියා නමැති සැකකරුගෙන් දීර්ඝ ලෙස කල ප්‍රශ්න කිරීම් වලදී ලබාගත් තොරතුරු අනුව මෙම සැකකාර ආමි ශිවා අත්අඩංගුවට ගත් බව උසස් පොලිස් නිලධාරියෙකු පැවසීය.

අත්අඩංගුවට ගත් සැකකරු සන්තකයේ තිබී ජීව අත් බෝම්බ එකක්, බෝර 12 ෂොට්ගන් ගිනි අවියක්, සයනයිඩ් කරලක්,, යුධ හමුදාවට අයත් බොඩි ආමර්( ආරක්ෂක ඇදුමක්) එකක්, ට් 56 උණ්ඩ පහක්, 9mm උණ්ඩ හතක්, බෝර 12 ෂොට්ගන් උණ්ඩ පහක්, යුධ හමුදා කැලෑ නිල ඇදුම් කට්ටල එකක්, සාමාන්‍ය නිල ඇදුම් කට්ටල එකක්, සිතියම් එකක්, සහ 231 ක් වන බලසේනාවට අයත් ෆයිල් 03 ක් පොලිස් භාරයට ගත් බව එම නිලධාරීන් පවසයි .

සැකකාර හමුදා සැරයන් මේජර්වරයා 18 දින අධිකරණයට ඉදිරිපත් කර දින හතක් රදවාප්‍රශ්න කිරීමට කටයුතු කරන බව පොලීසිය සදහන් කරයි

අලුත්ගම තුසිත කුමාර ද සිල්වා