අධිකව පැතිරෙන ඩෙල්ටා ප්‍රභේදය දැන් ඔස්ට්‍රේලියාවේත්

ඔස්ට්‍රේලියාවේ වික්ටෝරියා ප්‍රාන්ත බලධාරීන් අද (04දා) ප්‍රකාශ කළේ මෙල්බර්න් හි නවතම ආසාදන පොකුරේ ප්‍රථම වරට අධික ලෙස බෝවන ඩෙල්ටා කොවිඩ්-19 ප්‍රභේදය අනාවරණය වූ බවයි.

ලෝක සෞඛ්‍ය සංවිධානය විසින් කොවිඩ්-19 ප්‍රභේද හතර අතරට වර්ගීකරණය කර ඇති ඩෙල්ටා ප්‍රභේදය වඩාත් පහසුවෙන් ව්‍යාප්ත වන බවට සාක්ෂි සපයමින්, ඉන්දියාවේ විනාශකාරී සම්ප්‍රේෂණයට හේතු විය.

වික්ටෝරියා ප්‍රාන්තයේ ප්‍රධාන සෞඛ්‍ය නිලධාරි බ්‍රෙට් සුටන් මෙල්බර්න් හි මාධ්‍ය අමතමින් කියා සිටියේ එය සැලකිය යුතු කරුණක් බවය. මෙම නව ප්‍රභේදය හෝටල් නිරෝධායනයෙන් හෝ වෙනත් ස්ථානයකින් ඔස්ට්‍රේලියාවේ දැනට පැතිරී ඇති කොවිඩ්-19 ප්‍රභේදය සමග සම්බන්ධ වී නොමැති බව සුටන් පැවසීය.

"එය කලින් සිද්ධීන් හා සම්බන්ධ නොවීම කනස්සල්ලට කරුණක් බව කිව යුතුයි. නමුත් අපි ඒ සියලු ප්‍රාථමික සිද්ධි සම්බන්ධතා පසුපස හඹා යමින් සිටිනවා. එය සම්ප්‍රේෂණය වූයේ කෙසේදැයි සොයා බලමින් සිටිනවා." සුටන් වැඩිදුරටත් පැවසීය.

සති දෙකකට පෙර අසල්වැසි නිව් සවුත් වේල්ස් වෙත ගිය පවුලක සාමාජිකයන් දෙදෙනෙකු තුළ මෙම ඩෙල්ටා ප්‍රභේදය අනාවරණය වී තිබේ. එහිදී ඔවුන්ට ආසාදනය වූවා විය හැකි අතර, ප්‍රාන්තයේ දකුණු කලාපයේ ජනප්‍රිය සංචාරක ස්ථාන කිහිපයකට ඔවුන් ගොස් ඇත. ඒ අනුව නිව් සවුත් වේල්ස් වෙතින් ඩෙල්ටා ප්‍රභේදය සම්ප්‍රේෂණය වීමට ඉඩ ඇති නමුත් තවත් පරීක්ෂණ අවශ්‍ය වනු ඇති බව සුටන් පැවසීය.

ඔස්ට්‍රේලියාවේ වඩාත්ම ජනාකීර්ණ ප්‍රාන්තයක් වන නිව් සවුත් වේල්ස් මාසයක් තුළ දේශීයව හඳුනාගත් කිසිදු සිද්ධියක් වාර්තා කර නොමැත.

එමෙන්ම ඔස්ට්‍රේලියාවේ දෙවැනි වැඩිම ජනගහනය සහිත ප්‍රාන්තය වන වික්ටෝරියා, එහි නවතම පොකුර සමග මැයි 24 සිට ආසාදිතයන් 64ක් වාර්තා කර ඇත්තේ මාස තුනකට වැඩි කාලයක් කිසිදු සිද්ධියක් නොමැතිව සිටි පසුබිමකය.

මිනිසුන් දැඩි සංචරණ සීමා පැනවීම සහ ආර්ථිකයේ විශාල කොටසක් වසා දැමීම සමග ඔවුන් දැන් මෙම නවතම රැල්ල සමග සටන් කරන අතර, සෘණාත්මක බව පරීක්‍ෂා කිරීමෙන් පසු නිරෝධායනයෙන් නිදහස් කරන ලද සංචාරකයෙකු මේ සමස්ත රැල්ලට වගකිව යුතු බව විශ්වාස කෙරෙයි.

ඒ අනුව ජුනි 10 දක්වා සංචරණ සීමා දීර්ඝ කිරීමෙන් පසු මෙල්බර්න් දෙවැනි සතියටත් ලොක්ඩවුන් කර ඇත. නමුත් බ්‍රහස්පතින්දා රාත්‍රියේ සිට ප්‍රාන්තයේ වෙනත් තැන්වල සමහර සීමා කිරීම් ලිහිල් විය. නමුදු මෙම නවතම ඩෙල්ටා ප්‍රභේදය සමග එරට සංචරණ සීමාවල හා ලොක්ඩවුන් තත්ත්වයන්හි වෙනස්කම් සිදුවිය හැකි බවද කියැවෙයි.

හදිසි අගුලු දැමීම්, කලාපීය දේශසීමා සීමා කිරීම් සහ දැඩි සමාජ දුරස්ථ කිරීමේ නීති බොහෝ දුරට ඔස්ට්‍රේලියාවට පූර්ව සම්ප්‍රේෂණයන් වලක්වා ගැනීමට සහ එහි කොවිඩ්-19 ආසාදිත සංඛ්‍යා සාපේක්ෂව අඩු මට්ටමක තබා ගැනීමට හැකි වී ඇත. ඒ අනුව මෙතෙක් එරට සමස්ත ආසාදිතයන් 30,100කට වඩා වැඩි සංඛ්‍යාවක් සහ මරණ 910ක් පමණක් වාර්තා වී ඇත.

මීට අමතරව ඔස්ට්‍රේලියාවේ වැඩිහිටි ජනගහනයෙන් 20%ක් පමණ ඔවුන්ගේ පළමු එන්නත මාත්‍රාව ලබාගෙන ඇති අතර, මේ වනවිට සමස්ත එන්නත් මාත්‍රා මිලියන 4.8කට ආසන්න ප්‍රමාණයක් ලබා දී ඇත.