අඩු ආදායම්ලාභින්ට අඩු මිලට භාණ්ඩ ගැනිමේ ජාතික වැඩපිළිවෙලක් - ජනපති

අඩු ආදායම්ලාභී ජනතාවට අඩු මිලට අත්‍යාවශ්‍ය ආහාර සැපයීමේ ජාතික වැඩපිළිවෙලක් ක්‍රියාවට නැංවිමට ජනාධිපති ගෝඨාභය රාජපක්ෂ මහතා තීරණය කර තිබේ. ‍

 එම වැඩසටහන යටතේ සෑම හිමිකම්ලාභියෙකුටම ආහාර මිලදි ගැනීමට විශේෂ ඉලෙක්ට්‍රොනික කාඩ්පතක් නිකුත් කරනු ලැබේ.

සමෘද්ධිලාභීන්, සමෘද්ධි හිමිකම් නොලබන පුද්ගලයන්, ස්ථීර රැකියාවක් නොමැති හා  වැවිලි ක්ෂේත්‍රයේ කම්කරුවන්, රැකියා නොමැති පවුල්වල ආබාධිතයන්, වැන්දඹු පවුල්, ස්ථාවර ආදායමක් නොමැති වැඩිහිටියන් සහ බරපතළ රෝගාබාධයන්ගෙන් පෙළෙන්නන් සිටින පවුල් මිට හිමිකම් කියයි. 

ඔවුන්ගේ ආහාර සුරක්ෂිතභාවය තහවුරු කිරිම  මෙම වැඩසටහනේ අරමුණයි.

සීනි, තේ, හාල්, පිටි, පරිප්පු, කඩල, ළූණු , මිරිස්, කරවල අල සහ කිරිපිටි ඇතුළු අත්‍යාවශ්‍ය පාරිභෝගික භාණ්ඩ සහන මිලකට ලබාදීම අපේක්ෂා කෙරේ. ලංකා සතොස, සමූපකාර වෙළෙඳ ජාලය සහ විශේෂයෙන් ග්‍රාමීය ප්‍රදේශවලින් තෝරාගත් බලයලත් වෙළෙඳසැල් මගින් ආහාර පහසුවෙන් මිලදි  ගැනීමට මූලික වශයෙන් අවස්ථාව සලසා ඇත.තෝරාගනු ලබන පහසුකම් අඩු ග්‍රාමිය වෙළෙදසැල් සඳහා සහන ක්‍රමයකට ශිතකරණ ඇතුළු උපකරණ ලබාගැනීමට ද පහසුකම් සැලසීමට  නියමිතය.

අදාළ වෙළෙඳසැල්, ජනාකීර්ණ ප්‍රදේශවලද, අඩු ආදායම්ලාභී නිවාස සංකිර්ණ, ග්‍රාමීය පළාත්වල සහ වැවිලි ක්ෂේත්‍රය ආවරණය වන පරිදි පිහිටුවිම කෙරෙහි අවධානය යොමුවි ඇත. බලයලත් වෙළෙඳ සැල් තෝරා ගැනීමේ දී කාන්තා ව්‍යවසායකයන්ට  ප්‍රමුඛත්වයක් ලබා දෙනු ඇත. 

මෙමඟින් කුඩා පරිමාණ ව්‍යාපාරිකයන් සහ නිෂ්පාදකයන් නගා සිටුවිමට ද ජනාධිපතිතුමා අපේක්ෂා කරයි. දේශීය නිෂ්පාදකයන්ට මූලිකත්වය දෙමින් ඔවුන් නිපදවන ඇසුරුම්කළ ආහාර, කුළු බඩු, මස් මාලු, බිත්තර හා අනෙකුත් ගෘහ අවශ්‍යතා අදාළ ව්‍යාපාරිකයන් වෙත අතරමැදියන්ගේ තොරව ඝෘජුවම ලබාදිමට ඒ අනුව ව්‍යාපෘතියෙන් පහසුකම් සැලසෙනු ඇත.

වැඩසටහනට සමගාමීව ග්‍රාමීය වතු සහ නාගරික ප්‍රදේශයන්හි ගෘහ ඒකක එක්ලක්ෂ පනස්දහසක් සඳහා පානීය ජලය ලබාදීමටත්, ග්‍රාමීය මාර්ග කි.මි ලක්ෂයක් සංවර්ධනය කිරිමටත් අපේක්ෂා කෙරේ.

දිළිදු හා අඩු ආදායම්ලාභීන් ලෙස හඳුනාගනු ලබන පුද්ගලයන්ට ඉඩම් අමාත්‍යාංශය, ඉඩම් ප්‍රතිසංස්කරණ කොමිසන් සභාව සහ බිම් සවිය සමග සම්බන්ධීකරණය කර  කෘෂිකර්ම, ව්‍යාපාර සංවර්ධනය සහ නිවාස ව්‍යාපෘති වෙනුවෙන් තිස් අවුරුදු බදු පදනමෙන් ඉඩම් කැබලි ලක්ෂයක් ලබාදීම කෙරෙහි ද ජනාධිපතිතුමා තීරණය කර ඇත.