අගමැති සමඟ සාකච්ඡාවෙන් පසු බිත්තර මිල රු 2කින් පහළට

තංගල්ල කාර්ල්ටන් නිවෙසේදී අග්‍රාමාත්‍ය මහින්ද රාජපක්ෂ  සමඟ කළ සාකච්ඡාවකින් අනතුරුව ලබන සඳුදා සිට බිත්තරයක මිල රුපියල් දෙකකින් අඩු කිරීමට අද(5) තීරණය කළ බව සමස්ථ ලංකා බිත්තර නිශ්පාදකයන්ගේ සංගමය කියයි.

අග්‍රාමාත්‍යවරයාගේ ඉල්ලීමකට අනුව අද(5) පස්වරුවේදී සමස්ථ ලංකා බිත්තර නිශ්පාදකයන්ගේ සංගමයේ අධ්‍යක්ෂ මණ්ඩලයේ සාමාජිකයන් තංගල්ල කාර්ල්ටන් නිවෙසට පැමිණ සිටි අතර එහිදී බිත්තර මිල සම්බන්ධයෙන් සහ නිශ්පාදකයන්ගේ ගැටළු සාකච්ඡා කෙරිණි.

අගමැතිවරයා සමඟ පැවැති සාකච්ඡාවෙන් අනතුරුව ලබන සඳුදා සිට බිත්තරයක මිල රුපියල් දෙකකින් අඩු කිරීමට එහිදී තීරණය කළ බවද ඒ අනුව සුදු බිත්තරයක තොග මිල රුපියල් 19.50ක් සහ රතු බිත්තරයක තොග මිල රුපියල් 20ක් ද වන අතර සිල්ලර මිල රුපියල් 21ක් සහ රතු බිත්තරයක මිල රුපියල් 22ක් ද වන බව සමස්ථ ලංකා බිත්තර නිශ්පාදකයන්ගේ සංගමයේ සභාපති ආර්.එම්.සරත් මහතා කීවේය.