අමුනුෂ්‍යයන් පලවා හරින උදෑසන තේ පානය
කේන්දරයෙන් හෝ වාස්තු පරීක්ෂාවක් සිදු කිරීමේදී බොහෝවිට ඔබට බලපාන ග්‍රහ අපල හෝ වාස්තු දෝෂ පිළිබඳව සඳහන් වේ. ඇතැම් කායික හා මානසික ගැටලු සම්බන්ධයෙන් ඇතැමෙකු මැණික් ගල්, යන්ත්‍ර මන්ත්‍ර, බලිතොවිල්, යාගහෝම යනාදිය සිදුකිරීමට උපදෙස් දෙයි. එහෙත් ඇතැම් විට ඔබට කායික හා මානසිකව දැනෙන අපහසුතාව ඉතා සුළු පිළියමකින් නිට්ටාවට සුවකළ හැකිව තිබේ. ඒ සඳහා එක් ජ්‍යෝතිෂ චිකිත්සක ක්‍රමයක් කරාබු නැටි සමග සම්බන්ධ වේ. මේ ඒ පිළිබඳව ප්‍රවීණ ටොලමියානු ජ්‍යෝතිර්වේදී
කේ.සී.ජේ. රත්නායක මහතා සමග කළ කතාබහකි.
“ඕනෑම කෙනෙකු දවස ආරම්භ කරන්නේ උණුසුම් තේ කෝප්පයකිනි. මේ තේ කෝප්පය කෙනෙකුගේ ජීවිතයේ මුළු දවසටත්, ඔබගේ ජීවිතයේ දිගුකල් පැවැත්මටත් මහෝපකාරී විය හැකි අමෘතයක් බව ඔබ දන්නේද? උදෑසන තේ පානය සම්බන්ධයෙන් ඔබට හුරු පුරුදු ඇබ්බැහිකම් සෞඛ්‍යාරක්ෂිත නොවේ. අද අප ඔබට වටහා දෙන්නට උත්සහ ගනුයේ විශ්වය තුළ පවතින ප්‍රධාන ශක්තීන් උදෑසන පානය කරන තේ කෝප්පය මගින් ඔබට ලබාගත හැකි ආකාරය පහදා දීමටය.
තේ ගස හෙවත් එයින් ලබාගන්නා තේ කොළ විශ්වයේ පවතින පඨවි (Earth) ශක්තිය සංකේතවත් කරයි. සීනි හෝ පිටිකිරි ආදිය මිශ්‍ර නොකර කහට තේ තුළ පඨවි ශක්තිය ඉතා තදින් ක්‍රියාත්මක වේ. එය ශරීර වර්ධනයට හා උත්තේජනයට පිටුබලයක් සපයයි. තේ බොනවා නම් සීනි හෝ පිටිකිරි ආදිය මුසු නොකළ යුතු බව තතු දත්තෝ පවසති.
මේ තේ කහට සමග ඔබේ සිරුරේ කායික හා මානසික ප්‍රබෝධයට ඉවහල් කරගත හැකි සොබාදහම තුළ පවතින අනෙකුත් ශක්තීන් මුසු කොටගත හැකි ක්‍රම ගණනාවකි. එයින් ප්‍රධානම ක්‍රමයක් වන්නේ කහට තේ සමග කරාබු නැටි මුසු කිරීමය. උණුසුම් තේ කහට කෝප්පයකට කරාබු නැටි 1ක් දමා, එය මිනිත්තු 4ක් පමණ වසා තැබීමෙන් ඔබට මෙය සාදාගත හැකිය. එම තේ කෝප්පය පානය කරන ඔබට සොබාදහමෙන් ලැබෙන ප්‍රතිලාභ මොනවාදැයි ඔබ දන්නවාද ?
1. රාත්‍රිය පුරා ඔබේ සිරුර තුළ ඒකරාශී වූ අඳුරු ශක්තීන් මෙම කරාබු නැටි තේ පානයත් සමගම විනාශ වී යයි. එහි ප්‍රතිඵලයක් වශයෙන් ඔබ තුළ ක්ෂණිකව කායික හා මානසික ප්‍රබෝධයක් හටගනී. මෙහිදී මුළු දිනයම එම ශක්තිජනක ප්‍රබෝධයෙන් දවස ගතකිරීමට උපකාරී වේ.
2. ඕනෑම මිනිස් ශරීරයක පරිවෘත්තීය ක්‍රියාවන් හරිහැටි සිදු නොවන්නේ ඊට අදාළ ශක්ති විශේෂය දුබල වූ විටය. කරාබු නැටි තුළ අඩංගු ‘ත්‍රිෂ්ණ’ හෙවත් ගිනිකාරක ගුණය හේතුවෙන් අවහිර වූ දූෂිත වායෝ ශක්තියද, සුධිත වූ අපෝ ශක්තියද ක්ෂණයකින් සිරුරෙන් ඉවත් කර දැමේ. එහි ප්‍රතිඵලයක් වශයෙන් බඩ පිපුම, උදෑසන දැනෙන අප්‍රාණික භාවය, නොරිස්සුම් සහගත බව, අහාර අරුචිය හා ආතතිය යන අනෙක් තත්ත්වයන් මර්දනය වේ. පුරාණ ග්‍රීක රෝම ජනසමාජයේ මෙකී කරාබු නැටි මිශ්‍ර පානය දිව ඔසුවක් ලෙස සැලකූ බව සඳහන් වේ. ටොලමියානු ජ්‍යෝතිෂයේ නිර්මාතෘ ක්ලෝඩියස් ටොලමි පවා මෙකී පානය ස්වකීය සොබාදහම පිළිබඳ නිරීක්ෂණ චාරිකාවට උපකාර කරගත් බව සඳහන් වේ.
3. දත් , වීදුරුමස්, මුඛය ආදී ස්ථාන ආශ්‍රිතව ආයෝ ශක්තිය බහුලව ක්‍රියාකාරී වන අතර, බෝහෝ විට දූෂිත වූ ශක්තිය හේතුවෙන් මුඛය ආශ්‍රිත රෝග මෙන්ම, මුඛ දුර්ගන්ධයක්ද හටගනී. විශේෂයෙන් කාන්තාවක් වන ඔබ මේ තත්ත්වයට ගොදුරුව සිටින්නේ නම් ඔබගේ පවුල තුළින් මෙන්ම සමාජයෙන්ද ඔබට ලැබෙනුයේ අමිහිරි ප්‍රතිචාරයක් විය හැකිය. මේ සඳහා කොතෙකුත් ප්‍රතිකාරයන් ගත් නමුත් සුවපත් වී නැත්තේ නම් සීනි හෝ කිරි රහිත උණුසුම් කහට තේ කෝප්පයක් කරාබු නැටි 1ක් මුසුකොට පානය කිරීමෙන් ඔබට ක්ෂණික හා දිගුකාලීන සුවය ලැබේ.
4. උදරය ඉදිරියට නෙරා ඒම බොහෝ කායික හා මානසික බලපෑමකට හේතුවකි. උදෑසන හෝ රාත්‍රියට කරාබු නැටි මිශ්‍ර තේ පානයෙන් උදරය නෙරා ඒමේ අවසනාවන්ත තත්ත්වය බෝහෝ සෙයින් පාලනය කරගත හැකිය.
5. ක්‍රියාශීලී කාන්තාවක වූ ඔබට ඇතැම් විට විවිධ ප්‍රිය සම්භාෂණවලට සහභාගි වීමට සිදු වේ. එවැනි අවස්ථාවකදී අපත්‍ය ආහාර යන ආදිය භුක්ති විඳීමට සිදුවනු ඇත. එවැනි අවස්ථාවක ආරක්ෂාකාරී උපක්‍රමයක් ලෙස කරාබු නැටි කරලක් උණු වතුර සමග මිශ්‍ර කර පානය කිරීම ග්‍රැස්ට්‍රයිටිස්, උදාරාබාධ හා අජීර්ණ යනාදී කරදරකාරී අවස්ථාවන්ගෙන් ආරක්ෂා වීම සඳහා පිහිටක් කොටගත හැකිය.
ඔබ සැමදා පුරුද්දට මෙන් පානය කරන ඒකාකාරී තේ කෝප්පයෙන් බැහැර වන්න. ඒ වෙනුවට කරාබු නැටි මුසු, කහට තේ කෝප්පයක් පානය කර බලන්න. මුලදී නුහුරක් දැනිය හැකි නමුත් දෙවැනි දිනයේදී ඔබට එය ඉතාම පියකරු වනු ඇත. ඊට හේතු වනුයේ කරාබු නැටි සතු ප්‍රබෝධමත් ශක්තිජනක ක්‍රියාකාරීත්වය සහ එය සතු විෂබීජ නාශක ගුණය ඔබට ප්‍රත්‍යක්ෂ වන හෙයිනි.
භූත දෝෂ, කුම්බාණ්ඩ දෝෂ හේතු කොටගෙන අමනුෂ්‍ය උපද්‍රව්‍යවලින් ඇතැම් කෙනෙක් ඔබව බියට පත්කර තිබේ නම් කරාබු නැටි මුසු කොට තේ පානය කර බලන්න. අමනුෂ්‍යයන් පලායනු ඇත.
කෂිනි හපුආරච්චි
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
