LPL අද ආරම්භ වෙයි

ලංකා ප්‍රිමියර් ලීග් හෙවත් එල්.පී.එල් ක්‍රිකට් තරගාවලියේ දෙවැනි අදියර අද ආරම්භ වෙයි.

තරගාවලියේ පළමු තරගය අද රාත්‍රී 7.30ට කොළඹ ආර්. ප්‍රේමදාස ක්‍රීඩාංගනයේ දී ආරම්භ වීමට නියමිතව ඇත්තේ භානුක රාජපක්ෂ නායකත්වය දරන ගෝල් ග්ලැඩියේටර්ස් කණ්ඩායම හා තිසර පෙරේරා නායකත්වය දරන ජැෆ්නා කිංග්ස් කණ්ඩායම අතරයි.

එම තරගයට පෙර තරගාවලියේ සමාරම්භක උත්සවය පස්වරු 6 ට ආරම්භ වීමට නියමිතව තිබේ.

මෙවර තරගාවලිය අද සිට ලබන 23 වනදා දක්වා පැවැත්වෙන අතර, තරග 20කින් යුත් පළමු වටයේ තරග කොළඹ ආර්. ප්‍රේමදාස ක්‍රීඩාංගනයේ දී ද, අවසන් වටයේ තරග හම්බන්තොට මහින්ද රාජපක්ෂ ක්‍රීඩාංගනයේ දී ද පැවැත්වීමට නියමිතයි.