සෙංකඩගල මෝටර් රථ ක්‍රීඩා සමාජයෙන් ධාවකයන්ගේ යතුරු පැදි සහ මෝටර් රථ ප්‍රදර්ශනයක්

සෙංකඩගල මෝටර් රථ ක්‍රීඩා සමාජය විසින් සංවිධානය කරනු ලබන මෝටර් රථ සහ යතුරුපැදි ප්‍රදර්ශනයක් දෙසැම්බර් මස 21 සහ 22 යන දෙදින ප.ව. 01.00 සිට රාත්‍රී 10.00 දක්වා මහනුවර නගර මධ්‍යයේ සහස් උයන පරිශ්‍රයේදී පැවැත්වීමට නියමිතය.

මෙහිදී දැනට ලාංකීය යතුරුපැදි සහ මෝටර් රථ ධාවන තරගාවලිවල පෙරමුණේ පසුවන තරගකරුවන් සහ තරගකාරියන් තම රථ සමග මේ සඳහා ඉදිරිපත් වීමට නියමිතය. තවද මෙහිදී විදුලි රථ, පැරණි මෝටර් රථ, පැරණි යතුරුපැදි, ජාත්‍යන්තර තරග ජයග්‍රහණය කළ යතුරුපැදි සහ නවීන අධිධාරිතා මෝටර් රථ වැනි විවිධ කාණ්ඩයන් යටතේ වාහන දැකබලා ගැනීමට අවස්ථාව සලසා දී තිබේ.

මෙවැනි ප්‍රදර්ශනයක් මධ්‍යම පළාත තුළ පවත්වනු ලබන්නේ පළමු වතාවට වන අතර, මෙය මහජනතාව වෙනුවෙන් නොමිලේ දැකබලා ගැනීමට අවස්ථාව උදාකරදී ඇත. ඒසීබීටී අධ්‍යාපන ආයතනය, මැක්සිස් ටයර්, නිපෝන් තීන්ත ඇතුළු ආයතන රැසක් මෙම ප්‍රදර්ශනයේ අනුග්‍රාහකත්වය දරනු ලබයි.