බෘස් යාඩ්ලි ජීවිත ඉනිම නිමා කරයි

හිටපු ඔස්ට්‍රේලියානු ටෙස්ට් ක්‍රීඩකයකු මෙන්ම ශ්‍රී ලංකා ක්‍රිකට් කණ්ඩායමේ හිටපු ජාතික පුහුණුකරුවෙක් වන බෘස් යාඩ්ලි ජීවිත ඉනිම නිමා කර තිබේ.

 මිය යන විට ඔහු 71 වැනි වියෙහි පසුවූ අතර, ඔස්ට්‍රේලියාව වෙනුවෙන් ටෙස්ට් තරග 33කට සහ එක්දින තරග 07කට ක්‍රීඩා කර තිබේ. පිට දඟපන්දු යවන්නෙකු ලෙස ඔහු ඔස්ට්‍රේලියානු කණ්ඩායමට තම සේවය වසර පහක් පුරාවට ලබාදුන් ඔහු 1983 වසරේදී ජාත්‍යන්තර පිටියෙන් සමුගන්නා විට ටෙස්ට් කඩුලු 136ක් සහ එක්දින කඩුලු 07ක් දවාගෙන තිබුණි.

අනතුරුව යාඩ්ලි විස්තර විචාරකයෙක් සහ පුහුණුකරුවෙක් ලෙස කටයුතු කළ අතර 1997 වසරේදී ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරුවා ලෙස පත්විය. මුත්තයියා මුරලිදරන් පන්දුව දමාගසන බවට ඔස්ට්‍රේලියානුවන් චෝදනා කරද්දී ඊට එරෙහිව නිර්භයව පෙනී සිටි ඔස්ට්‍රේලියානුවෙකු ලෙසද යාඩ්ලි හැඳින්විය හැකිය.

යාඩ්ලිගේ අභාවයට ශෝකය පළ කරමින් ශ්‍රී ලංකා ක්‍රිකට් ආයතනය මාධ්‍ය නිවේදනයක් නිකුත් කර තිබුණි.