නව තේරීම් කමිටු සභාපති වර්ණපුරද? මහානාමද?

මේ දිනවල එක්සත් අරාබි එමීර් රාජ්‍ය‘යේ පැවැත්වෙන ආසියානු කුසලාන ක්‍රිකට් තරගාවලියේදී ශ්‍රී ලංකා කණ්ඩායම ලැබූ දැඩි පසුබෑම පිළිබඳව වගකීමක් ශ්‍රී ලංකා ජාතික ක්‍රිකට් තේරීම් කමිටුවටද පැවැරෙන බැවින් එම කමිටුවද ඉවත් කර නව තේරීම් කමිටුවක් පත්කිරීමට ක්‍රීඩා අමාත්‍ය ෆයිසර් මුස්තාපා මහතා ඉදිරි දින කිහිපය තුළදී කටයුතු කරනු ඇති බව 'අද'ට වාර්තා වේ.

මෙහිදී අදාළ නව ජාතික තේරීම් කමිටුවේ සභාපති තනතුර සඳහා හිටපු ටෙස්ට් ක්‍රිකට් නායකයන් වන බන්දුල වර්ණපුර හා රොෂාන් මහානාමගේ නම් යෝජනා වී ඇති බවත් හෙළි වේ.

ශ්‍රී ලංකා කණ්ඩායම වර්තමානයේදී ලද දරුණු පසුබෑම හේතුවෙන් චෝදනා ලැබූ ඇන්ජිලෝ මැතිව්ස්ට නායකත්වයෙන් ඉල්ලා අස්වන ලෙසට යෝජනා කරන්නට ග්‍රැහැම් ලැබ්රෝයි ප්‍රමුඛ ජාතික ක්‍රිකට් තේරීම් කමිටුව සහ ප්‍රධාන පුහුණුකරු චන්දික හතුරුසිංහ කටයුතු කළද මෙසේ ලද පරාජයන්ගේ වගකීමෙන් මිදීමට ජාතික තේරීම් කමිටුව සහ ශ්‍රී ලංකා කණ්ඩායමේ ප්‍රධාන පුහුණුකරු හතුරුසිංහටද නොහැකි බව ක්‍රීඩා අමාත්‍යවරයාගේ මතය වී තිබේ.

තම ඉල්ලා අස්වීම සම්බන්ධව හිටපු නායක ඇන්ජිලෝ මැතිව්ස් විසින් ශ්‍රී ලංකා ක්‍රිකට් ප්‍රධාන විධායක ඈෂ්ලි ද සිල්වා වෙත යවන ලද ලිපියේද වගකීම පිළිබඳව එවන් මතයක් පළ කර ඇත.

කෙසේ වෙතත් නව තේරීම් කමිටුව පත්කිරීමට පෙර ක්‍රීඩා අමාත්‍යවරයා අයි.සී.සී යට පොරොන්දුවූ පරිදි මෙරට ක්‍රිකට් පරිපාලනය සඳහා පස් දෙනෙකුගෙන් යුත් කළමනාකරණ කමිටුව ඉදිරි සතිය තුළදී පත්කිරීමටද නියමිත බව අනාවරණය වේ.

ශ්‍රී ලංකා ක්‍රිකට් නිලවරණය පැවැත්වෙන තෙක් පරිපාලන කටයුතු වෙනුවෙන් පත්කරන කළමනාකරණ කමිටුවේ එක් සාමාජිකයකු ලෙස ක්‍රිකට් ආයතන නිසි බලධාරී ක්‍රීඩා අමාත්‍යාංශයේ ලේකම් කමල් පද්මසිරි මහතා කටයුතු කරන අතර, ඉතිරි සාමාජිකයන් සිවුදෙනා සඳහා හිටපු ජාතික මට්ටමේ ක්‍රිකට් ක්‍රීඩකයන් නොව ක්‍රිකට් පිළිබඳවද දැනුමක් ඇති පරිපාලනයේ ප්‍රවීණයන් පත්කරන බවද ක්‍රීඩා අමාත්‍යවරයා පැවසීය.

කෙසේ වෙතත් විවිධ පිරිස් ක්‍රීඩා අමාත්‍යවරයාට යෝජනා කර ඇත්තේ මෙම කමිටුව සඳහා හිටපු ක්‍රිකට් ක්‍රීඩකයන් පමණක් පත්කරන ලෙසයි. මේ සම්බන්ධයෙන් අප ක්‍රීඩා අමාත්‍යවරයාගෙන් කරුණු විමසූ අතර ඔහු පවසා සිටියේ, මෙම සතිය තුළ ඒ සම්බන්ධව අවසන් තීන්දුවක් ගන්නා බවයි.