පාර කියන්නේ අපායටයි
ශ්‍රී ලංකාවේ ජනමාධ්‍ය ක්‍ෂේත්‍රයේ ප්‍රධානතම මාධ්‍ය සමූහයක ප්‍රධාන හිමිකරුවා වන්නේ ලංකාවේ ප්‍රමුඛතම වතුර බට නිෂ්පාදකයාය. වතුර බට නිෂ්පාදනයේ යෙදෙමින් ව්‍යාපාරවල යෙදුණු ඔහු මාධ්‍ය ව්‍යාපාරට පැමිණෙනුයේ ගුවන් විදුලියේ රසවතකුගේ ඇසුර නිසාවෙනි. කිසිවෙකුගේත් අවධානයට ලක් නොවූ, චින්තනමය දිළින්දෙකු වූ මෙම හිමිකරුට මහරාජා කෙනෙකුට මෙන් අතිරික්ත මුදල් තිබුණි.
මෙලෝ රහක් නැති ඔහුගේ ජීවිතය රසවත්, බලවත් හැම කෙනාගේම අවධානයට ලක්වන ජීවිතයක් බවට පත්වූයේ ඔහුගේ අතිරික්ත ධනය මාධ්‍ය ව්‍යාපාරයට යොදවා ගොඩනැගූ මෙම මාධ්‍ය ආයතනය නිසාවෙනි.
මෙම මාධ්‍ය ආයතනයේ සේවය කරන්නන් සියලු දෙනාටම පාහේ ඇත්තේ එක සමාන සුදුසුකම්ය. මෙහි විධිමත් අධ්‍යාපනයක් ලබා ඉහළ හෝ අදාළ තනතුරුවල කටයුතු කරන කිසිවෙකුත් නොමැති තරම්ය. මෙම ආයතනයේ ඉහළම තනතුර වන සමූහ අධ්‍යක්ෂක තනතුරේ සිට පහළම තනතුර වන සනීපාරක්ෂක කම්කරු තනතුර දක්වා සියලු දෙනාටම ඇත්තේ එක සමාන අධ්‍යාපන සුදුසුකම්ය. ඔවුන් අතර වෙනසක් ඇත්නම් ඒ ඔවුන්ගේ තනතුරු නාමය, මාධ්‍ය ආයතනයක සේවය කිරීම නිසා එකිනෙකා තනි තනිව හදාගත් සිවිල් බලය හා අඟපසග පමණි. මෙහි සියල්ලෝම උසස් පෙළ සමතුන් වෙති. එබැවින් එම ආයතනයේ සනීපාරක්ෂක කම්කරුවෝද උසස් පෙළ සමතුන් විය යුතුය. මන්ද උසස් පෙළ සමත් වීම තවදුරටත් ලංකාවේ මැජික් එකක් නොවේ.
නමුත් මෙම ආයතනයේ මෙම සුදුසුකම් රහිත ඊනියා මාධ්‍යවේදීන් ප්‍රවෘත්ති විකාශයන් තුළත්, දේශපාලන වැඩසටහන් තුළත් හැසිරෙනුයේ ලෝකයේ පිළිගත් මාධ්‍ය සදාචාර, ආචාර ධර්ම තුට්ටුවකට මායිම් නොකරමිනි. මේ සඳහා හොඳම උදාහරණය වන්නේ රාජගිරිය ගුවන් පාලම සම්බන්ධයෙන් ඔවුන් හැසිරුණු ආකාරයයි. අද එම පාලම හේතුවෙන් රථ වාහන තදබදය සියයට හැත්තෑවකටත් වඩා අඩු වී තිබේ. නමුත් ගුවන් පාලම විවෘත කළ දිනවල විවිධ ඩිජිටල් ග්‍රැෆික් පෙන්වමින් සාමාන්‍ය නිවේදකයන් ලවා ඉන්ජිනේරුවන්ගේ මතයට අභියෝග කරමින් මොකද්දෝ අණ්ඩර දෙමළයක් ඔවුන් දෙසා බෑවේය. අද එය සම්පූර්ණයෙන්ම කෙබරයක් බවට පත් වී තිබේ. ඒ පිළිබඳ අද ඔවුන්ට වගේ වගක් හෝ ලැජ්ජාවක් නොමැත. දැන් ඔවුන් වෙනත් බොරුවක් ප්‍රකාශ කරයි.
මාධ්‍ය ආයතනයකට ලබාදෙනු ලබන ඉඩකඩ හා සංඛ්‍යාත රජයක් විසින් නියාමනය කරනුයේ එමගින් විශාල සමාජ හානියක් සිදුකිරීමට මාධ්‍ය ආයතනවලට ඉඩ තිබූ නිසාවෙනි. නමුත් මෙම සමාගමේ හිමිකරු අඩු සුදුසුකම් සහිත, දුර්වල, ගැඹුරක්, දිගක්, පළලක් නැති මිනිසුන් යොදා ගනිමින් තමන්ගේ ජීවිතයේ ෆැන්ටසි ඉටු කර ගැනීමට උත්සහ කරයි. මෙම ආයතනයේ සේවයට පැමිණෙන කවරෙකු හෝ පළමු මාස හතර මෙහි ගතකළහොත් ඔහු දිගු කාලයක් එම ආයතනයේ සේවය කරන බවට කතාවක් පවතී. මන්ද මෙම පළමු මාස හතර තුළ ආත්ම ගරුත්වයක් ඇති, පෞරුෂයක් ඇති ඕනෑම කෙනෙකු මෙම ආයතනය අතහැර යන බැවිනි. එසේ නොවන්නෝ හොරි කසමින්, කබ කඩමින්, මෙම ආයතනයේම සේවය කරයි.
මෙම ආයතනයේ හිමිකරුට සෑම වෙලාවේම මුහුණදෙන ඇරියස් තිබේ. එක්සත් ජාතික පක්ෂයේ නායක රනිල් වික්‍රමසිංහ සමග ඇති අර්බුධය මේ සඳහා ඇති හොඳම උදාහරණයයි. එක්සත් ජාතික පක්ෂය වැඩකටයුතු කළ යුත්තේ තමන්ගේ සිතැඟි අනුව බවට සිතන තරමට මෙම ව්‍යාපාරිකයා ලොකු වී තිබේ. එසේ වුවද ඡන්දයක් පැමිණි විට පක්ෂයේ සාමාජිකයන් රුපියල් විස්ස විස්ස එකතු කොට සාදාගන්නා ලද මුළු අරමුදලම එම සමාගම මගින් බලහත්කාරයෙන් ඉල්ලා සිටී. එසේ නොදෙන විට ඔවුන් රනිල් වික්‍රමසිංහට ප්‍රහාර එල්ල කරයි.
2001, 2004 ආණ්ඩුවේදී ආරක්ෂක, මුදල් හා විදේශ ඇමතිකම් තමන් යෝජනා කරන අයට ලබාදිය යුතු බව එවකට අගමැති රනිල් වික්‍රමසිංහ මහතාට මෙම ව්‍යාපාරිකයා දැනුම් දුන්නේය. එය ප්‍රතික්ෂේප කළ විට එදා සිට අද දක්වා අඛණ්ඩ වෛරයක් රනිල් වික්‍රමසිංහ කෙරෙහි මෙම ව්‍යාපාරිකයාට තිබේ. ඒ මත පදනම්ව එක්සත් ජාතික පක්ෂයේ අරමුදල් මංකොල්ල කෑමේ සිට නායකයා වෙනස් කිරීම දක්වා වූ සියලුම කටයුතුවලට ඔවුන්ගේ මාධ්‍ය ආයතන තුළින් බලපෑම් කරමින්, මෙම සමාගම මැදිහත් වේ. දශක එකහමාරක් තිස්සේ ඔවුන් කෙතරම් උත්සහ කළද රනිල් වික්‍රමසිංහටවත්, එක්සත් ජාතික පක්ෂයටවත් ඔවුන්ට කළ හැකි කිසිවක් නොවීය.
රටේ කටයුතුවලදී රටේ සියලුම සංවර්ධන ව්‍යාපෘතිවල ටෙන්ඩර්, කොන්ත්‍රාත්, කොමිස් මුදල් හා ඒකාධිකාරය තිබිය යුත්තේ තම සමාගම සතුව යැයි මෙම ව්‍යාපාරිකයා කල්පනා කරයි. ඔවුන් කොළඹ පෝර්ට් සිටියෙන්, නුවර අධිවේගී මාර්ගවලින් හා තවත් ව්‍යාපෘති ගණනාවකින්, තම මාධ්‍ය මගින් තර්ජනය කොට විශාල කප්පම් මුදල් ලබාගත් බවට තොරතුරු ජනතාව අතර සංසරණය වේ.
එසේම කප්පම් ලබාගනිමින් නොනවතින මෙම ව්‍යාපාරික සමාගම ජනාධිපති ලේකම් කාර්යාලයේ, ජනාධිපති මාධ්‍ය අංශය හා කාර්යාලයේ බොහෝ තනතුරු පුරවා ඇත්තේ මෙම සමාගමේ සේවය කළ හෝ සේවය කරමින් සිටින අයගෙනි. මෙම මාධ්‍ය ආයතනයේ එම බලය හා හැඩය උපයෝගී කරගනිමින් ලංකාවේ බොහෝ ආයතනවලට කතා කරමින් ජනාධිපතිතුමන්ගේද නම ගාවා වෙළෙඳ දැන්වීම් ලබාගනී. මේ ලියුම්කරුට (මට) මෙම සමාගමෙන් එක් දිනක් දුරකථන ඇමතුමක් පැමිණි අතර, එම දුරකථන ඇමතුමේ වැඩි ප්‍රමාණයක් තිබුණේ, ජනාධිපතිතුමා කීවා, ජනාධිපතිතුමාට අදාළව, ජනාධිපතිතුමා වෙනුවෙන් යන යෙදුම්ය. මා අවසානයේ ඔවුන්ගෙන් ඇසුවේ මේ ඇමතුම ඔබේ ව්‍යාපාරික ස්ථානයෙන්ද, නැතිනම් ජනාධිපති ලේකම් කාර්යාලයෙන්ද කියාය. එම ඇමතුම මගින් ඔවුන් එතරම් දුරට ජනාධිපතිතුමන් විකුණා දැමුවේය.
යහපාලන රජයට චෝදනා එල්ලවන තවත් ප්‍රධාන ගනුදෙනුවක් වන්නේ රජයේ ගුවන්විදුලි හා රූපවාහිනී සංඛ්‍යාත මගඩියයි. එහි වටිනාකම කෝටි 3000ක් පමණ යැයි රජය තක්සේරු කර තිබේ. මෙම සංඛ්‍යාත සියල්ල මෙම කුප්‍රකට මාධ්‍ය ආයතනය විසින් හිමිකරගෙන ඇති අතර, එම නිසා ලංකාව ඩිජිටල්කරණයේදී ලංකා ආණ්ඩුව මෙම සමාගමට මුදල් ගෙවා ඔවුන් යටතේ සිදුකිරීමට සිදු වී තිබේ. මෙම සංඛ්‍යාත මගඩිය සඳහා ජනාධිපතිවරයාගේ නමද ඈදී ඇති බව මා පුවත්පත් ගණනාවක දුටුවේය.
මෙවැනිම ඒකාධිකාරයක් පවත්වාගෙන යන අනෙකුත් ක්‍ෂේත්‍රය වන්නේ ලංකාවේ අලි වැටවල් ගැසීමයි. අලි වැටවල් ගැසීම මෙම සමාගමේ ඒකාධිකාරයක් බවට ඔවුන් පත්කරගෙන තිබේ. අවසාන වශයෙන් කිව යුත්තේ මෙම සමාගම කල්පනා කරනුයේ, එහි හිමිකරුට මේ රටේ සියලුම බලයන් කේන්ද්‍රගත කළ යුතු බවයි. එය රටේ ස්වාධිපත්‍යයට, ප්‍රජාතන්ත්‍රවාදයට, මාධ්‍ය නිදහසට දැඩි හානියකි. නමුත් මෙම ව්‍යාපාරිකයා තේරුම් නොගන්නා දෙය නම්, ඔහු මේ සියල්ල හැරදමා මිය යන බවයි.
මොහුගෙන් ආණ්ඩුව බේරා ගැනීම ජනාධිපතිතුමන්ගේ වගකීමකි. එසේම මොවුන් විසින් ජනාධිපතිතුමාගේත්, ආණ්ඩුවේත් සහයෝගයට විශාල හානියක් හිතාමතාම කුමන්ත්‍රණකාරී ලෙසින් සිදුකරයි. එය ජනාධිපතිවරයාට මාරාන්තිකය. මෙහි අලුත්ම වැඩසටහන වන්නේ ඔවුන්ගේ නිවේදකයන් ලංකාවේ ආණ්ඩුකාරවරයන් වීමයි. මේ රටේ දේශපාලනඥයන්, සිවිල් ප්‍රජාව හා ජනතාව මෙම මාධ්‍ය මාෆියාව ප්‍රතික්ෂේප කළ දිනට ලංකාවට සාමයේ, සමෘද්ධියේ හා සංවර්ධනයේ අරණලු උදාවන බව මාගේ හැඟීමයි.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
