Spiralation Demo Day 5 වැනි වරටත් ICTA පරිශ්‍රයේදී පැවැත්වේ

දේශීය තොරතුරු තාක්ෂණ  නවෝත්පාදකයන් දෙස් විදෙස් ආයෝජකයන් වෙත හදුන්වා දීම මෙන්ම, වෙළෙඳපොළ සොයාදීම වෙනුවෙන් පවත්වනු ලබන Spiralation Demo Day 5 වැනි වරටත් ශ්‍රී ලංකා තොරතුරු හා සන්නිවේදන තාක්ෂණ නියෝජිතායතන (ICTA) පරිශ්‍රයේදී පැවැත්විණි.

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය විසින් මෙය සංවිධාන කරන ලදී.

තොරතුරු තාක්ෂණ ක්ෂේත්‍රයේ ව්‍යවසායකයන්ට ආරම්භක අවධියේ සිට ඉදිරියට ඒමට දිරිමත් කරන හා නවෝත්පාදකයන්ට අනුග්‍රහය දක්වන Spiralation වැඩසටහන යටතේ ලියාපදිංචි වූ ඉතා සාර්ථක නව තොරතුරු තාක්ෂණ නවෝත්පාදකයන් මෙම Spiralation Demo Day හිදී ඇගයීමටද ලක්විය.

තොරතුරු තාක්ෂණ ව්‍යවසායකත්වය ශ්‍රී ලංකාව තුළ ප්‍රචලිත කිරීමද අරමුණු කර ගනිමින් පවත්වන මෙම Spiralation Demo Day වැඩසටහන සඳහා රාජ්‍ය සහ පෞද්ගලික අංශයේ නොමඳ සහභාගිත්වය හා සහයෝගය ලැබී තිබිණි.

තාක්ෂණික අධ්‍යාපන, ඉ-වාණිජ්‍ය , බ්ලෝක් චේන්, ක්ලීන් ටෙක්, රොබෝ තාක්ෂණය, අධ්‍යාපනික පරිගණක ක්‍රීඩා ඇතුළු ක්ෂේත්‍ර යටතේ නව තොරතුරු තාක්ෂණ නවෝත්පාදකයන් 7දෙනෙකු සිය නවෝත්පාදන මේ සඳහා ඉදිරිපත් කර තිබිණි.

මෙහිදී ඇගයීමට පාත්‍රවූ එම තොරතුරු තාක්ෂණ නවෝත්පාදන ගැන ප්‍රකට දෙස් විදෙස් තොරතුරු තාක්ෂණ සමාගම්වල නියෝජිතයන් ඉදිරියේ සිය නවෝත්පාදන ගැන සවිස්තරාත්මක ඉදිරිපත් කිරීම් සිදුකිරීමටද අවකාශ සලසා දී තිබිණි.

මෙතෙක් පවත්වන ලද Spiralation Demo Day ඔස්සේ කරළියට පැමිණි  තොරතුරු තාක්ෂණ නවෝත්පාදකයන් බහුතරයක් දෙනා මේ වනවිට දේශීය හා ජාත්‍යන්තර වෙළෙඳපොළට තම සේවා හා භාණ්ඩ සපයමින් සිටීමද විශේෂත්වයකි.

මෙම අවස්ථාවට එක්වූ Spiralation වැඩසටහනෙහි උපායමාර්ගික සහකරු වන  බ්‍රැන්ඩික්ස් කෝපරේෂන් කැම්පස් ආයතනයේ ප්‍රධාන විධායක නිලධාරී ප්‍රියංග දසනායක මහතා අදහස් දක්වමින් මෙසේ පැවසීය.

“ශ්‍රී ලංකාව මේ වනවිට පවතින මට්ටමෙන් ඉදිරියට යෑමට නම් රටේ ආර්ථිකය ශක්තිමත් කළ යුතු වෙනවා. ඒ වෙනුවෙන් මේ ආකාරයෙන් රටේ තොරතුරු තාක්ෂණ  නවෝත්පාදකයෙන් සවිබල ගැන්වීම අතිශයින් වැදගත්. ඒ සඳහා පුර්ණ සහයෝගය අප ලබාදෙනවා. විශේෂයෙන්ම ලෝකයේ ආර්ථික අතින් ශක්තිමත් රටවල් ඩොලර් බිලියන ගණන් මුදල් උපයන්නේ මේ ක්ෂේත්‍රයෙන්. එසේ නම් ශ්‍රී ලංකාවෙත් ඒ ආකාරයෙන් විදේශ විනිමය උත්පාදනය කළ හැකි ආයතන ස්ථාපිත කිරීම වැදගත් වෙනවා.”

මෙහිදී අදහස් දැක්වූ ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ ප්‍රධාන ඩිජිටල් ආර්ථික නිලධාරී සචින්ද්‍ර සමරරත්න මහතා  මෙසේ පැවසීය.

“ඩිජිටල් ආර්ථිකයක මූලික පදනම ව්‍යවසායකත්වය හා නවෝත්පාදන කීවොත් එහි වරදක් නැහැ. එය බලගැන්වීමෙන් රටේ ආර්ථිකයට ශක්තියක් වෙනවා. මේ Spiralation Demo Day මඟින් හඳුන්වා දුන් තොරතුරු තාක්ෂණ නව නවෝත්පාදකයන් මේ වනවිට ජාත්‍යන්තර තලයේ සම්බන්ධතා පවා ඇතිකරගෙන ඉදිරියට පැමිණ තිබීම අපට සතුටක්.”

මෙම  Spiralation Demo Day වැඩසටහන සඳහාප්‍රධාන අනුග්‍රහයකයා වශයෙන් කටයුතු කරනු ලැබුවේ Bug Zero සමාගම වේ. මෙම අවස්ථාවට තොරතුරු තාක්ෂණ කර්මාන්ත ක්ෂේත්‍රයේ සමාගම් ප්‍රධානීන්‚ ආයෝජකයන් ඇතුළු පිරිසක් සහභාගි වී සිටියහ.