සහන පොලී අනුපාත යටතේ වූ ණය වඩාත් පුඵල් පරාසයකින්

දැනට ක්‍රියාත්මක සහනදායී පොලී අනුපාත යටතේ ලබාදෙන ණ්‍ය යෝජනා ක්‍රම සම්බන්ධව පුවත්පත්වල පළ වන විවිධ ප්‍රවෘත්ති සම්බන්ධව සැලකිල්ලට ගනිමින් මුදල්, ආර්ථික හා ප්‍රතිපත්ති සංවර්ධන අමාත්‍යාංශය සිය ස්ථාවරත්වය පළ කර තිබේ.

ඒ අනුව, සහනදායී පොලී අනුපාත යටතේ ලබාදෙන ණය යෝජනා ක්‍රම මගින් සුළු හා මධ්‍ය පරිමාණ ව්‍යවසායකයන් දිරිමත් කිරීම හා එමගින් ජාතික ආර්ථිකයට ලැබෙන දායකත්වය තවදුරටත් වර්ධනය කිරීම රටේ ආර්ථික වර්ධනය කෙරෙහි සෘජුව බලපාන ප්‍රධාන සාධකයක් බව රජය පැහැදිලිව අවබෝධ කරගෙන ඇත.

දැනට පවතින ණය යෝජනා ක්‍රම ජාතික ආර්ථිකයේ ප්‍රමුඛතා ක්ෂේත්‍ර මැනවින් හඳුනාගෙන ක්‍රියාත්මක කළ යුතු බව නව රජයේ ස්ථාවරත්වය වී ඇත.

ඒ නිසා ආර්ථිකයේ ප්‍රමුඛ ක්ෂේත්‍ර හඳුනාගෙන එම ක්ෂේත්‍ර මගින් ජාතික ආර්ථිකයට දායකත්වය ඉහළ නැංවීමේ අරමුණින් නව රජයේ ප්‍රතිපත්තිවලට අනුකූල වන ලෙස මෙම ණය යෝජනා ක්‍රම නැවත සමාලෝචනය කිරීමට හා ප්‍රතිසංවිධානය කිරීමට අමාත්‍යාංශය තීරණය කර තිබේ.

ඒ අනුව, විධිමත් අධ්‍යයනයකින් පසුව එම ණය යෝජනා ක්‍රම වඩාත් පුළුල් පරාසයක් ආවරණය වන පරිදි හා ඵලදායී ආයෝජන අරමුණු කරගනිමින් වඩාත් ශක්තිමත්ව ක්‍රියාත්මක කිරීමට ඉදිරියේදී රජය විසින් පියවර ගනු ඇති බව අමාත්‍යංශය වැඩිදුරටත් පවසයි.