’’ද නිවුස් පේපර්’’ සිනමාපටය අපේක්ෂකත්ව ප්‍රවර්ධන කටයුත්තක්ද?
මෙවර මැතිවරණය සඳහා කොළඹ දිස්ත්‍රික්කයෙන් පොදුජන පෙරමුණ යටතේ තරඟ කරන බන්දුල ගුණවර්ධන මහතාගේ සම නිෂ්පාදනයක් වූ "ද නිවුස් පේපර් " නැමති චිත්‍රපටය මඟින් අපේක්ෂකත්ව ප්‍රවර්ධනයක් සිදුවන බව කැෆේ සංවිධානය මැතිවරණ කොමිසම වෙත දැනුම් දෙයි.
එම සංවිධානයේ විධායක අධ්‍යක්ෂ අහමඩ් මනාස් මකීන් මහතා සඳහන් කළේ ජුලි 02 වනදා දිවයිනේ සියලු සිනමාශාලාවල නොමිලේ ප්‍රදර්ශනය කිරීමට සැලසුම් කර ඇති බව වාර්තා වන බවයි.
මෙම චිත්‍රපටය ජුලි 02 වනදා නොමිලේ ප්‍රදර්ශනය කිරීම මඟින් සහ චිත්‍රපටය ප්‍රවර්ධන කටයුතු වලදී ප්‍රචාරාත්මක වාසි අත්කර ගැනීමේ සංවිධානාත්මක අරමුණක් ඇති බව කැෆේ සංවිධානයේ විධායක අධ්‍යක්ෂවරයා පෙන්වා දෙයි.
මෙම දර්ශන කොවිඩ් මර්දනයට සහාය වන සෞඛ්‍ය කාර්ය මණ්ඩලවලට, ත්‍රිවිධ හමුදාවට, පොලීසියට සහ මාධ්‍යවේදීන්ට ද තම නිල හැඳුනුම්පත භාවිත කරමින් එක් වතාවක් සිනමා පටය නොමිලේ නැරඹීය හැකි බව ජනාධිපති කාර්යාල නිල වෙබ් අඩවිය පවසයි.
මෙලෙස මෙම චිත්‍රපටය මහජනතාවට නොමිලේ චිත්‍රපට ප්‍රදර්ශනය කිරීම සහ සෞඛ්‍ය කාර්ය මණ්ඩල , හමුදාව සහ පොලීසිය වැනි රාජ්‍ය නිලධාරින් ඒ සඳහා කැඳවා ගැනීම බරපතළ මැතිවරණ නීති උල්ලංඝණය කිරීමක් වන බව අහමඩ් මනාස් මකීන් මහතා පවසයි.
එමෙන්ම මෙම චිත්‍රපටයේ ප්‍රචාරක කටයුතු වලදී මහමැතිවරණ අපේක්ෂකයෙකුගේ නම යොදා ගැනීම මඟින් ද මැතිවරණ නීතියේ සදාචාරාත්මක බවට හානියක් සිදුවන වන බව කැෆේ විධායක අධ්‍යක්ෂවරයා පවසයි.
එබැවින් මෙම චිත්‍රපටය මුවාවෙන් සිදුකිරීමට යන අපේක්ෂකත්ව ප්‍රවර්ධන කටයතු පිළිබඳ සොයා බලා සුදුසු තීරණයක් ගන්නාමෙන් කැෆේ සංවිධානය මැතිවරණ කොමිසමෙන් ඉල්ලීමක් කළ බව කැෆේ සංවිධානයේ විධායක අධ්‍යක්ෂ අහම්ඩ් මනාස් මකීන් මහතා සඳහන් කරයි.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
