සංජීවගේ මරණයට හේතු අධිකරණයේදි හෙළිවෙයි

වෙඩි වැදීමෙන් පපුවට, බෙල්ලට සහ උදර ප්‍රදේශයට සිදුවූ බහුවිධ තුවාල හේතුවෙන් සංජීව කුමාර සමරරත්න හෙවත් ගණේමුල්ල සංජීව නමැත්තාගේ මරණය සිදු වී ඇති බවට කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය අද (28දා) තීන්දු කළාය.

සිද්ධියට අදාළව දින දෙකක කාලයක් පුරා පැවැති මහෙස්ත්‍රාත් පරීක්ෂණයේදී ඉදිරිපත් වූ සාක්කි සහ පශ්චාත් මරණ පරීක්ෂණ වාර්තාව සැළකිල්ලට ගනිමින්  සංජීව කුමාර සමරරත්න හෙවත් ගණේමුල්ල සංජීව නමැත්තාගේ මරණයට අදාළ නියෝගය නිකුත් කරමින් මහෙස්ත්‍රාත්වරිය එලෙස නියම කළාය.

කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය හමුවේ පැවති මහෙස්ත්‍රාත් පරීක්ෂණයේදී කොළඹ අපරාධ කොට්ඨාශයේ නිලධාරීන්ගේ මෙහෙයවීම යටතේ සාක්ෂි දුන් ඝාතනයට ලක්වු සංජීව කුමාර සමරරත්න හෙවත් ගණේමුල්ල සංජීව නමැත්තාගේ සහෝදරිය වන දිල්රුක්ෂි සමරරත්න මහත්මිය සාක්කි දෙමින් මෙම සිද්ධියෙන් මියගොස් සිටින්නේ සංජීව කුමාර සමරරත්න මගේ මල්ලියි.

ඔහු රඳවා හිටියේ බූස්ස බන්ධනාගාරයේ. සතියට දෙවතාවක් මල්ලි බලන්න මම බුස්ස බන්ධනාගාරයට යනවා. මල්ලීට තියෙන නඩු ගැන මට දැනීමක් නැහැ.

නඩුවකට ඉදිරිපත් කිරීම සඳහා පසුගිය 19 වැනිදා මල්ලී කොළඹ මහෙස්ත්‍රාත් අධිකරණයට රැගෙන ආ බව මා දැන සිටියේ නෑ. එදා පෙරවරු 10.30ට 11.00ට විතර දුරකථනයෙන් කතා කළ කෙනෙක් මල්ලිට වෙඩි තියලා කියලා කිව්වා. ඒත් එක්කම මා නීතඥ ලක්ෂ්මන් පෙරේරා මහතාට කතා කළා. එයා කිව්වා සංජීවට වෙඩි තිබ්බා කියලා ආරංචියක් තියෙනවා කියලා. පසුව උසාවියේදී වෙඩි වැදුණු බව මා දැනගත්තා.

මල්ලීගේ ප්‍රශ්චාත් මරණ පරීක්‍ෂණය පසුගිය 20 වැනිදා කොළඹ අධිකරණ වෛද්‍ය කාර්යාලයේ පැවත්වුණා. එයට සහභාගි වු මා මියගොස් ඇත්තේ මගේ මල්ලී වන සංජීව කුමාර සමරත්න කියලා හඳුනාගත්තා.
පසු දිනයක මා කෙසෙල්වත්ත පොලීසියට ප්‍රකාශයක් දුන්නා. පසුව අම්මයි, මමයි මල්ලීගේ මෘත දේහය බාරගත්තා”

අගතියට පත් පාර්ශ්වය වෙනුවෙන් පෙනීසිටි නීතිඥවරු අධිකරණය හමුවේ කරුණු දක්වමින්, මරණයට පත් වූ සංජීව කුමාර සමරත්න නමත්තාට වෙඩිතැබීමේ සිද්ධිය පිළිබඳව පූර්ණ විමර්ශනයක් පැවැත්වීම අවශ්‍ය බවත් ඔහුගේ ආරක්ෂාවට යොදවා සිටි බන්ධනාගාර සහ පොලිස් විශේෂ කාර්ය බලකා නිලධාරීන්ගේ ක්‍රියාකාරීත්වය පිළිබඳව විමර්ශනයක් කිරීම වැදගත් බවත් පෙන්වා දුන්හ.

ඉදිරිපත් වූ සියලු කරුණු සලකා බැලලීමෙන් අනතුරුව මරණයට අදාළ හේතුව දැක්වෙන තීන්දුව ප්‍රකාශයට පත් කළ මහෙස්ත්‍රාත්වරිය නඩුව මාර්තු 07 වැනිදා යළි කැඳවීමට නියම කළාය.

සචිත්‍ර ගුණසේකර