වැඩිහිටි ජනගහනයෙන් සියයට 12 කගේ එකම දතක්වත් නැහැ

ලංකාවේ වැඩිහිටි ජනගහනයෙන් 12% කට  එකම දතක්වත් නැති බවත්, එය විශාල ගැටලුවක් බවට පත්ව තිබෙන බවත්, දත් ආරක්ෂා කර ගැනීම, මුඛ සෞඛ්‍ය ආරක්ෂා කර ගැනීම පිළිබදව දැනුවත්කිරීම පෙර පාසලේ සිටම ආරම්භ විය යුතු බව සෞඛ්‍ය හා කර්මාන්ත අමාත්‍ය වෛද්‍ය  රමේෂ් පතිරණ මහතා අවධාරණය කරයි.

අමාත්‍යවරයා මේ බව අවධාරණය කරන ලද්දේ “සතුටු මුවයි-සුවැති සිරුරයි” යන්න තේමා කර ගනිමින්  ලෝක මුඛ සෞඛ්‍ය දිනය වෙනුවෙන් අද දින (22) ගාල්ල සමනල ක්‍රීඩාංගනයේදී පැවති විශේෂ උත්සවයකට සහභාගි වෙමිණි.

ලෝක මුඛ සෞඛ්‍ය දිනයට සමගාමීව සෞඛ්‍ය අමාත්‍යාංශය, ශ්‍රී ලංකා දන්ත වෛද්‍ය සංගමය, යුනිලීවර් සමාගම එක්ව සංවිධානය කරන ලද මෙම විශේෂ දන්ත කදවුර මගින් ගාල්ල දිස්ත්‍රික්කයේ පාසල් දරුවන් 2000 අධික පිරිසකගේ මුඛ සෞඛ්‍ය පරීක්ෂාව හා මුඛ සෞඛ්‍ය පිළිබද පෙර පාසල් ගුරුවරුන් දැනුවත්  කිරීමට සැලසුම් කර තිබිණ .

ලංකාවේ ප්‍රමුඛතම රෝගය බවට දන්ත රෝගය පත්ව තිබෙන බව වෛද්‍යවරුන් හෙලි කල බවත්,  දරුවන් හා මැදිවියේ වයස් ගත වන ජනගහනය අතරෙත් දන්ත රෝග නිසා විශාල පීඩාවකට ලක් වන බවත් ප්‍රකාශ කර සිටියේය..

ජීවිතයේ මුල් කාලයේ සිට  අවසාන කාලය දක්වාම මනා  දන්ත සෞඛ්‍ය තත්වයක් පවත්වාගෙන යාම ඉතාම වැදගත් කාරණයක් බව පෙන්වා දුන් අමාත්‍යවරයා මුඛ පිලිකා වලින් ලංකාවේ විශාල පිරිසක් දුක්විදින බවද පැවසීය.

විශාල මුදලක් රජය විදිහටත්, පුද්ගලයන් විදිහටත් ඊට වැය කරන බවත්, ජනතාව දැනුවත් කිරීම ඉතා කාලෝචිත ක්‍රියාවක් බවද පැවසීය. බුලත්විට සැපීම හරහා දුම්කොළ, හුණු, පුවක් වල තිබෙන යම් යම් පිළිකා කාරක  ද්‍රව්‍යය අවගේ සෞඛ්‍ය පද්ධතියට අති විශාල හානියක් සිදුකරන බව පෙන්වා දුන් අමාත්‍යවරයා  අයහපත් සිරිත් වලින් බැහැර වී යහපත් පුරුදු ඇති කර ගන්නට මෙවැනි වැඩමුළු ඉතා වැදගත් වන බවත් දරුවන් කුඩා කාලයේ සිටම දැනුවත් කිරීම ද, ඉතාම වැදගත් බවද පෙන්වා දුන්නේය.