වකුගඩු රෝගින් ගසා කන ජාවාරමක්

දිනෙන් දින දිවයින පුරා වකුගඩු රෝගය වැළඳීම සහ වකුගඩු රෝගීන් ගසා කන  විශාල ජාවාරම්කරුවන් බෝවීම නිසා මහජනතාව දැඩි අපහසුතාවයකට  ලක් වෙමින් පවතින නිසා වහාම රජය මේ පිළිබඳව මැදිහත් වන්නැයි බුලාගල රන්දෙනිය රජමහා විහාරාධිපති සීගිරි කස්සප මහා පිරිවෙනේ ආචාර්යය ඇල්ලවැවේ සංඝරත්න හිමියෝ ඉල්ලා සිටිති.

කාලයක සිට වකුගඩු රෝගය නිසා තම පවුලේ බොහෝ දෙනෙකු මෙන්ම  තම  පියාගේද ජීවිතය මේ රෝගය නිසා අහිමි වූ බව පෙන්වා දෙන උන්වහන්සේ මේ බරපතල ප්‍රශ්නය පිළිබඳව අවබෝධයෙන් යුතුව සොයා බලන්නැයි ඉල්ලා සිටිති.

වකුගඩු රෝගය වැළඳීම පිළිබඳව සෑම රජයක්ම දීමනා වැඩි කිරීම වාට්ටු වැඩි කිරීම ලේ  මාරු කිරීම සඳහා රෝහල් ඇතිකිරීම වකුගඩු සායන පැවැත්වීම සිදුකරනවා විනා  රෝගය වැළඳෙන ආකාරය වළක්වා ගත හැකි ආකාරය පිළිබඳව නිශ්චිතව ජනතාව දැනුවත් නොකිරීම ඒ පිළිබධව පරීක්ෂණ නොකෙරිම බරපතළ ප්‍රශ්නයක් බව උන්වහන්සේ පෙන්වා දෙති

රට පුරා දිනෙන් දින සීග්‍රයෙන් වර්ධනය වන මෙම වකුගඩු   රෝගය වැළදෙන ආකාරය සෙවීම සඳහා රටේ මහා සංඝරත්නයේ පූර්ණදායකත්වය සහයෝගය රජයට ලබාදීමට හැකි බවද උන්වහන්සේ පෙන්වා දෙති.

රටේ වෙනත් ප්‍රශ්න ගැටලූ   ගැන පමණක් සාකච්ඡාවට බඳුන් වන අවස්ථාවක දිනෙන් දින මහ ජනතාව  පවුල් පිටින් අසරණවීම ජීවනෝපාය අහිමිවීම වකුගඩු සොයා සේසතම අහිමිකර ගැනීම   වෛද්‍යවරුන් යැයි කියාගන්නා කොටසක් සහ ජාවාරම්කරුවන් වකුගඩු අලෙවි කිරීමෙන්ම වකුගඩු  තැරැව්කරුවන් බෝවීම   රෝගීන් මුළාවට පත් කිරීම ආදී දිනපතා සිද්ධීන් රැසක් රට තුළ වාර්තා වෙන නමුත් ඊට කිසිදු නෛතික ක්‍රියාමාර්ගයක් නොගන්නේ මන්දැයි උන්වහන්සේ බලධාරීන්ගෙන් ප්‍රශ්න කර  සිටිති.

පැවති සෑම රජයක්ම වෙතම තමන් වහන්සේ මෙම වකුගඩු රෝගය වැළඳෙන ආකාරය හේතුව සොයාගන්නා ලෙස පරීක්ෂණ ආරම්භ කරන ලෙස දැනුවත් කළද ඒ සියල්ල අහිමි වූ බවත් නව ආණ්ඩුවක් බලයට පත්ව ඇති නිසාමේ රටේ අසරණ අහිංසක ගොවි ජනතාව වැඩි වශයෙන් මෙම මාරාන්තික රෝගයට ගොදුරු වී තිබෙන බවද මේ රජයේ හෝ කඩිනම් අවධානය යොමු කරවන ලෙස පෙන්වාදෙති.

මෙරට බොහෝ මහා සංඝයා වහන්සේලා වකුගඩු රෝගීන් සඳහා තම එක වකුගඩුවක් දම් දී දාන පාරමිතා පුරන බවත් තවත් වසර කිහිපයක් යද්දී ස්වාමීන් වහන්සේලා සියලු දෙනාම තනි වකුගඩුවෙන් ජීවත් වන තත්ත්වයට පත්වෙන බවක් වකුගඩු දෙකම ගලවා දීමට නොහැකි නිසාවෙන් වහාම මේ පිළිබඳව බලධාරීන්ගේ අවධානය යොමු කරන ලෙස  ඉල්ලා සිටි උන් වහන්සේ රෝගීන් ගසා කන ජාවාරම නවතා දමන ලෙස ඉල්ලා සිටිති.