ලංකාවේ භාවිත ඖෂධවලින් සියයට 80ක්ම ආනයනිකයි

මෙරට භාවිත කරන ඖෂධවලින්  සියයට අසුවක්ම ආනයනය කරන බවත් එම ඖෂධවලින් සියයට අසූපහක් ගෙන්වනු ලබන්නේ ඉන්දියාවෙන් බවත්  කැබිනට් ප්‍රකාශක, අමාත්‍ය නලින්ද ජයතිස්ස මහතා සඳහන් කරයි.

ඉතිරි ඖෂධ බංගලාදේශය, පකිස්තානය, ජාපානය හා යුරෝපා රටලින් ගෙන්වන බවද ඔහු පවසා සිටියේය.

ඖෂධ ගෙන්වීමෙහිදී නියාමනය කරනු ලබන්නේ ජාතික ඖෂධ නියාමන අධිකාරිය විසින්  බවත් දැනට ඖෂධ සංග්‍රහ තුනක් යටතේ ඖෂධ ගෙන්වීම සිදුකරන බවත් මේ අනුව එක්සත් ජනපදය, ජාපනය හා බ්‍රිතාන්‍ය  ඖෂධ සංග්‍රහ යටතේ ඹෟෂධ ගෙන්වන බවත් හෙතෙම පවසා සිටියේය.

 ඉන්දියානු ඖෂධ ගෙන්වන නිසා ඉන්දීය ඖෂධ සංග්‍රහය මේ වන විට රජය පිළිගෙන තිබෙන බවත්  මිට අදාළ ගිවිසුමක් අත්සන් කර තිබෙන බවත් ඇමතිවරයා සඳහන් කළේය.

කුමන අවබෝධතා ගිවසුම් අත්සන් කළත් ඖෂධවල ප්‍රමිතිය පිළිබඳව අවසන් තීරණය ගන්නේ  ජාතික ඖෂධ නියාමන අධිකාරිය බවත් මෙය රට පාවා දෙන ගිවිසුමක් බවට ඇතැම් පිරිස් සඳහන් කළත් එය විහිලු කතාවක් වන බවත් ඔහු පවසා සිටියේය.

දේශීය නිෂ්පාදකයන් ආරක්ෂා කර ගනිමින්  ආනයනයට ඉඩ සලසන බව හා ඊට අදාළ වැඩපිළිවෙළක් ක්‍රියාත්මක වන බවද ඔහු සඳහන් කළේය. මෙම ගිවිසුම්වලින් දේශීය නිෂ්පාදකයන්ට කිසිදු ගැටලුවක් ඇති නොවන බවද ඒ මහතා කියා සිටියේය.