රජයේ පොහොර සමාගම් දෙක ඒකාබද්ධ කරයි

මෙතෙක් කළක් රජයට අයත් කොමර්ෂල් පොහොර හා ලංකා පොහොර සමාගම් දෙක අද දින (12) සිට State Fertilizer නාමය යටතේ රජයට අයත්  සමාගමක් වශයෙන් ඒකාබද්ධ කිරීමට පියවර ගෙන ඇත.

මෙතෙක් කළක් සභාපතිවරු දෙදෙනෙක් හා අධ්‍යක්ෂ මණ්ඩල දෙකක් හා කාර්ය මණ්ඩල දෙකක්  වශයෙන් පැවැති එම සමාගම් දෙක ඒකාබද්ධ කිරීම මගින් මෙතෙක් කළක් වැය වූ විශාල මුදලක් රජයට ඉතිරි කර ගැනීමට හැකි වී තිබේ.

රජයට අයත් පොහොර සමාගම් දෙක ඒකාබද්ධ කිරීම හා නව නාමය හඳුන්වා දීම  සඳහා ඊයේ (11) වෝටර්ස් එජ් හෝටලයේ දී උත්සවයක් පැවැතිවිනි. කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතාගේ ප්‍රධානත්වයෙන් පැවැති එම උත්සවයට රාජ්‍ය අමාත්‍යවරුන් වන ඩී. බී. හේරත්, කාදර් මස්තාන්, මොහාන් ප්‍රියදර්ශන සිල්වා,  අමාත්‍යාංශයේ ලේකම් ජානක ධර්මකීර්ති හා State Fertilizer සමාගමේ සභාපති ආචාර්ය ජගත් පෙරේරා යන මහත්වරු ද ඇතුලු විශාල පිරිසක් සහභාගි වී සිටියහ.

එකම අමාත්‍යාංශයක් යටතේ එකම විෂයට අදාලව කටයුතු කරන ආයතන විශාල ප්‍රමාණයක් දැනට අප රට තුළ පවතී. මේ නිසා රජයට මෙතෙක් මෙවැනි ආයතන සඳහා අමතරව විශාල මුදලක් වැය කිරීමට සිදු වී තිබේ. මෙම තත්ත්වය සැළකිල්ලට ගනිමින් එකම විෂය පථයට අයත් ආයතන ඒකාබද්ධ කිරීමේ වැඩ පිළිවෙළක් ආරම්භ කරන ලෙස ගරු ජනාධිපති රනිල් වික්‍රමසිංහ මැතිතුමන් විසින් අමාත්‍ය මණ්ඩලයට උපදෙස් දී තිබිනි.

රාජ්‍ය වියදම් කළමණාකරණය සඳහා මෙම වැඩ පිළිවෙළ ඉතාමත් සුදුසු බැවින් එසේ ඒකාබද්ධ කරන ලද ප්‍රථම ආයතන දෙක වන්නේ කොමර්ෂල් පොහොර සමාගම සහ ලංකා පොහොර සමාගමයි.

ඒ අනුව අද දින සිට (12) රජයට අයත් මෙම පොහොර සමාගම් දෙක State Fertilizer යන නමින් හඳුන්වනු ඇත.

මෙම උත්සවය සහභාගි වූ කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා-

රජයට අයත් පොහොර සමාගම් දෙක අද එක් ආයතනයක් බවට පත් කළා. මේ සමාගම් දෙකේ හිටපු සේවකයින් 400 ගණනක් අතරින් 273 දෙනෙක් ස්ව කැමැත්තෙන් විශ්‍රාම ගියා. ඒ අයට මෙතෙක් ඉතිහාසයේ රාජ්‍ය සේවකයින්ට ලබා දුන් ඉහළම වන්දිය අපි ලබා දුන්නා.  සේවා කාලය හා තනතුරු අනුව රුපියල් ලක්ෂ 09 සිට රුපියල් ලක්ෂ 89ක් දක්වා විශාල වන්දි මුදලක් ඒ අයට ලැබුනා.

පොහොර වැඩ පිළිවෙළ ශක්තිමත් කළේ  ජනාධිපති රනිල් වික්‍රමසිංහ මැතිතුමායි. 2021 පොහොර අර්බුදය නිසා ගොවි ජනතාව පාරට බැස උද්ඝෝෂණ කළා. නමුත් අපි නැවතත් රසායනික පොහොර ලබා දීමට පියවර ගැනීම නිසා මේ වනවිට අපි සහලින් ස්වයංපෝෂිත රටක් බවට පත්වී තිබෙනවා.

රනිල් වික්‍රමසිංහ මැතිතුමා පොහොර අර්බුදය විසදීමට ගත් පියවර නොවන්නට මේ රටේ සහල් කිලෝවක මිල රුපියල් 500ට වඩා වැඩිවන්නට ඉඩ තිබුනා. නමුත් 2023 වසරේ සිට අපේ රටේ ජනතාව පරිභෝජනය කරන්නේ අපේම රටේ වගා කළ සහල්. 2023 හා 2024 වසරවල දී හාල් ඇටයක්වත් අපි පිටරටින් ආනයනය කළේ නැහැ.