මියන්මාරයේ හා රුසියාවේ යුද්ධයට මැදිව සිටින අපේ අය බේරා ගන්න විපක්ෂ මන්ත්‍රීවරු තිදෙනෙක් එතෙර යති

මියන්මාරයේ පරිගණක අපරාධකරුවන් ගේ සයිබර් කදවුර තුළ බලහත්කාරයෙන් රදවා ගෙන සිටින ශ්‍රී ලාංකික තරුණ - තරුණියන් 49 දෙනා  සහ රුසියානු - යුක්‍රේන යුද්ධයට මැදි වී රුසියාවේ  සිටින  ශ්‍රී ලාංකික රණවිරුවන් බේරා ගෙන යළි ශ්‍රී ලංකාව වෙත රැගෙන ඒමේ රාජතාන්ත්‍රික මෙහෙයුමක් සදහා එම රටවල රාජතාන්ත්‍රික නිලධාරීන් සහ තෙවන පාර්ශවයන් සමග සාකච්ඡා කර වැඩපිළිවෙළක් සකස් කිරීම සදහා විපක්ෂයේ මන්ත්‍රීවරුන් තිදෙනකු 05/27 දින අලුයම දින 10 ක සංචාරයක් සදහා කටුනායක ගුවන් තොටුපොළෙන් මුළින්ම තායිලන්තය බලා පිටත්ව ගියහ .

මෙම විපක්ෂ මන්ත්‍රී කණ්ඩායමට නීතීඥ වසන්ත යාපා බණ්ඩාර , ජේ.සී.අලවතුවල සහ සුජිත් සංජය පෙරේරා යන මන්ත්‍රීවරුන් ඇතුළත් වී සිටි අතර මොවුන් මියන්මාරයේ සහ රුසියාවේ දින 05 බැගින් ගත කරමින් මෙම බේරා ගැනීමේ මෙහෙයුම දියත් කිරීමට නියමිතය .

මෙම විපක්ෂ මන්ත්‍රීවරුන් පිරිස ත්‍රයි නිකායික මහ නාහිමිවරුන්ගේ සහ විපක්ෂ නයකවරයාගේ ඉල්ලීම් රැගත් ලිපි රැගෙන මියන්මාරය සහ රුසියාව බලා පිටත්ව ගොස් තායිලන්තයේ , මියන්මාරයේ සංඝ නායක හිමිවරුන් සහ රුසියාවේ රාජතාන්ත්‍රික නිලධාරීන් හමු වී භාර දීමට නියමිතය .

මෙම සංචාරය පිළිබඳව වසන්ත යාපා බණ්ඩාර මන්ත්‍රීවරයා කටුනායක ගුවන් තොටුපොළේ දී මාධ්‍යවේදීන් හමුවේ මෙසේ සිය අදහස් ප්‍රකාශ කළේය .

 "පසුගිය කාළය පුරා මේ දරුවන් බේරා ගැනීම සදහා  විවිධ උත්සාහයන් මෙරට මගින් ගෙන තිබුණත් ඒවා මේ වනවිට සාර්ථක වී නැහැ. නමුත් නේපාලයේ , උගන්ඩාවේ දරුවන් බේරා ගෙන යනවා අපි දැක්කා . මේ ජාත්‍යන්තර අත්දැකීම මත විපක්ෂයේ මන්ත්‍රීවරුන් විදිහට මේ දරුවන් බේරා ගැනීමට අපි පියවර ගැනීමට ඉදිරිපත් උනා.

මෙම සංචාරය මියන්මාරයේ වද බන්ධන වලට ලක් වී සිටින දරුවන්ගේ දෙමාපියන් ගේ කදුළු පිස දැමීමේ උත්සාහයක්. අපි ඵලදායක ක්‍රියාමාර්ග හරහා යම්කිසි විදියකින් තෙවන පාර්ශ්වයක් මැදිහත් කර ගෙන මෙම දරුවන් බේරා ගැනීමට උත්සාහ ගන්නවා .

අපි මුළින්ම තායිලන්තයේ බැංකොක් නුවර වෙත ගොස් එතැන් සිට මියන්මාරයේ යැංගුන් නුවර බලා පිටත්ව යාමට සැළසුම් කර තිබෙනවා .

මෙම සංචාරයේ දී මියන්මාර බලධාරීන් සමග පමණක් නොව තායිලන්තයේ අධිකරණ , විදේශ කටයුතු අමාත්‍යවරුන් සමග මෙන්ම එරට මානව හිමිකම් ජාත්‍යන්තර සංවිධාන ද සමගත් අපි සාකච්ඡා කිරීමට බලාපොරොත්තු වෙනවා .

මෙම දරුවන් බේරා ගැනීම සදහා රජය පිළිබඳවම විශ්වාසයක් තබා නොගෙන , විශේෂයෙන් රාජතාන්ත්‍රිකභාවයක් නොමැති " තෙවන පාර්ශවයන් " සමග ඵලදායක ක්‍රියාමාර්ග ආරම්භ කිරීමට අපි කටයුතු කිරීමට බලාපොරොත්තු වෙනවා." යැයි ද වසන්ත යාපා බණ්ඩාර මන්ත්‍රීවරයා වැඩිදුරටත් පැවසීය .

  මෙම විපක්ෂ මන්ත්‍රීවරුන් කණ්ඩායම 05/27 දින අලුයම 01.10 ට ශ්‍රී ලන්කන් ගුවන් සේවයේ යූ.එල්.- 402 දරන ගුවන් යානයෙන් තායිලන්තයේ බැංකොක් නුවර බලා කටුනායක ගුවන් තොටුපොළෙන් පිටත්ව ගියහ .