මියගිය කතක නමින් ජීවත්ව සිටි බවට ලිපියක් නිකුත් කල ග්‍රාම නිළධාරී අත්අඩංගුවට

මියගොස් ඇති තැනැත්තියක වෙනුවෙන් ජීවත්ව සිටී බව සදහන් කරමින් ලියවිල්ලක් නිකුත්  කිරීම සම්බන්ධයෙන් ග්‍රාම නිළධාරීවරයෙකු  කළුතර කොට්ඨාශ විශේෂ අපරාධ විමර්ශන ඒකකය විසින් අත්අඩංගුවට ගෙන තිබේ.

මෙසේ අත්අඩංගුවට ගෙන ඇත්තේ කළුතර  තේක්කවත්ත ග්‍රාම නිළධාරී වසමේ මේ වනවිට රාජකාරි කරන ග්‍රාම නිළධාරී වරයා බව පොලිසිය කීය.

සැකකරු වස්කඩුව, මිල්ලගහන්දිය ප්‍රදේශයේ පදිංචි කරුවෙකු බවත්  52 හැවිරිදි වියේ පසුවන බවත් සදහන් වේ. 

සැකකාර ග්‍රාම නිළධාරී වරයා 2021 වර්ෂයේ කළුතර ප්‍රාදේශයේ  වෙනත් ග්‍රාම නිළධාරී වසමක රාජකාරි ආවරණය  කරමින් සිටියදී මියගොස් ඇති  කාන්තාවකගේ නමට ඇය ජීවත්ව සිටී බව සදහන් කරමින් මුස්ලිම්  දේවස්ථානයක මව්ලවි වරයෙකු අමතා  ලිපියක් නිකුත්කර ඇති බව පොලිසිය සදහන් කරයි.

එසේ නිකුත් කල ලිපිය රැගෙන ගිය කාන්තාව එම ලිපිය ඉදිරිපත් කර වෙනත් පුද්ගලයකුට හිමිකම් ඇති කළුතර වෙට්ටුමකඩ ප්‍රදේශයේ ඉඩමක කොටසක් වෙනුවෙන් ව්‍යාජ ඔප්පුවක් සකස්කර ගෙන ඇති බවද පොලිසිය සදහන් කරයි.

ලිපිය නිකුත් කල කාන්තාව තමා නොදන්නා බවත්, කුඩා දරුවන් දෙදෙනෙකු කැටුව පැමිණ ඉල්ලා සිටිමෙන් පසු ලිපිය නිකුත් කල බවත් ග්‍රාම නිළධාරී ගේ ප්‍රකාශ වලින් හෙලිව ඇති බවද පොලිසිය පවසයි.

සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි. කළුතර කොට්ඨාසය  විශේෂ අපරාධ විමර්ශන ඒකකය පරීක්ෂණ සිදුකරති.

පානදුර සුමිත් පොතුපිටිය