බිම තිබෙන ශ්‍රී ලංකන් යානා 03කට මසකට ඩොලර් ලක්ෂ 09ක වාරික ගෙවලා
ශ්‍රී ලංකන් ගුවන් සේවය සතු ගුවන්යානා 22ක් තිබෙන බවත් එහෙත් ඉන් යානා 03ක් භාවිතයට නොගෙන තිබියදී මසකට ඩොලර් ලක්ෂ 09කට ආසන්න ප්‍රමාණයක් වාරික ගෙවා ඇති බවත් මුදල් සහ ක්‍රම සම්පාදන නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා සඳහන් කළේය.
ශ්‍රී ලංකන් ගුවන් සේවයේ මෙහෙයුම් ශක්තිමත් කර ගනිමින් තිරසාර සංවර්ධනයක් ළඟා කර ගැනීමට 2025 - 2030 කාලය අතර පස් අවුරුදු සැලැස්මක් ඉදිරිපත් කර තිබෙන බවත්, එමෙන්ම ගුවන් සේවයේ ශේෂ පත්‍රය ප්‍රතිව්‍යුහගත කිරීමට කටයුතු කරන බවත්, මුදල් සහ ක්‍රම සම්පාදන නියෝජ්‍ය අමාත්‍යවරයා පැවසීය.
සමගි ජන බලවේගයේ පාර්ලිමේන්තු මන්ත්‍රී රෝහණ බණ්ඩාර මහතා වාචික පිළිතුරු අපේක්ෂාවෙන් ඊයේ (25දා) පාර්ලිමේන්තුවේදී යොමු කළ ප්‍රශ්නයකට පිළිතුරු ලබා දෙමින් හෙතෙම මේ බව සඳහන් කළේය.
මෙම සියලු කටයුතු කළමනාකරණයෙන් කිරීම හරහා ශ්‍රී ලංකන් ගුවන් සේවයේ ණය බර ජනතාව මත ඉදිරියේදී පැටවෙනු නොවනු ඇති බවට විශ්වාස කරන බවද නියෝජ්‍ය ඇමතිවරයා පැවසීය.
මුදල් සහ ක්‍රම සම්පාදන නියෝජ්‍ය අමාත්‍ය ආචාර්ය හර්ෂණ සූරියප්පෙරුම - ශ්‍රී ලංකන් ගුවන් සේවය සතු ගුවන්යානා සංඛ්‍යාව 22ක් තියෙනවා. නමුත් ඒකෙන් යානා 03ක් වසර ගණනාවක් තිස්සේ පාවිච්චියට නොගෙන තිබියදී ඒවාට අවශ්‍ය වාරික ගෙවමින් තිබිලා තියෙනවා. මසකට ඩොලර් ලක්ෂ 09කට ආසන්න ප්‍රමාණයක්. දැනට මෙම ආයතනයේ සේවක සංඛ්‍යාව ගත්තම ප්‍රධාන ගුවන් සේවයට අදාළව සේවක සංඛ්‍යාව 3,194ක් සහ ඊට අදාළ ක්‍රමෝපායික ව්‍යාපාර ඒකකවල සේවක සංඛ්‍යාව 2,862ක් ඉන්නවා. ඒ විදියට එකතුව 6,056ක් ඉන්නවා. මේ තත්ත්වය තුළ ආයතනය ශක්තිමත් කිරීම සඳහා ඉදිරියට ගනු ලබන ක්‍රියාමාර්ග අතර මෙහෙයුම් ශක්තිමත් කරමින් තිරසාර සංවර්ධනයක් ළඟා කර ගැනීම සඳහා ගුවන් සේවය 2025-26 මූල්‍ය වර්ෂයේ සිට 2029 - 30 මූල්‍ය වර්ෂය දක්වා වන කාලසීමාව සඳහා පංච වාර්ෂික සැලැස්මක් සූදානම් කරලා තියෙනවා.
ඒ අනුව ගුවන් සේවය ප්‍රධාන කරුණු කිහිපයක් ගැන අවධානය යොමු කරනවා. එකක් තමයි මෙහෙයුම් ලාභදායිත්වය සහ රජයේ සහයෝගීත්වය අවශ්‍ය වෙනවා. ශුද්ධ ලාභයට එල්ල වන ප්‍රධානම අභියෝගය වෙන්නේ අතීතයේදී ලබාගෙන තිබෙන ණය පියවීම සහ ගුවන්යානා කල්බදු පදනම මත ලබා දී ඇති සමාගම්වලට, එංජින් අලුත්වැඩියා කරන සමාගම්වලට දිය යුතු මුදල් දීමට නොහැකිභාවය. මෙම අභියෝගය ජය ගැනීමට අවශ්‍ය කෙටිකාලීන, මධ්‍යකාලීන සහ දිගුකාලීන වැඩපිළිවෙළක් සූදානම් කර ගැනීමටත්, අවශ්‍ය අරමුදල් සම්පාදනය කර ගැනීමටත් අමාත්‍යාංශය මේ වන විට සාකච්ඡා කරමින් ඉන්නවා. මේ තුළින් මූල්‍ය ස්වාධීනත්වය ළඟා කරගැනීම සඳහා ගුවන් සේවයේ ශේෂ පත්‍රය ප්‍රතිව්‍යුහගතකරණය කිරීම ඊට ඇතුළත් වෙනවා. ඒ වගේම ගුවන්යානා සංඛ්‍යාව වැඩි කරගැනීම, ආදායම් වර්ධනය කරවා ගැනීමට කටයුතු කරනවා.
සමගි ජන බලවේගයේ පාර්ලිමේන්තු මන්ත්‍රී රෝහණ බණ්ඩාර - ශ්‍රී ලංකන් එයාර්ලයින් එකේ ණය බර රජය විසින් භාරගෙන තිබෙනවා. පසුගිය මාස කිහිපයකට බිලියන 2ක් පාඩුයි කියලා වාර්තා වුණා. ඉතින් මේ සියල්ලම පවර ගත්තම රජය ඒ මුදල් පියව ගන්නේ කොහොමද? ගුවන්යානා භාවිත කරන අයටම ඉන්ධනවලට වගේ ටිකට්වලින් අය කරනවාද? නැතිනම් සමස්තය ලෙස රජයේ භාණ්ඩාගාරයට දාලා සම්පූර්ණ වක්‍ර බදු මුදල්වලින් අය කර ගන්නවාද?
මුදල් සහ ක්‍රම සම්පාදන නියෝජ්‍ය අමාත්‍ය ආචාර්ය හර්ෂණ සූරියප්පෙරුම - ජාත්‍යන්තරයේ දූෂණවලට මේ ආයතනය සම්බන්ධ වෙලා තියෙනවා. ජාත්‍යන්තර අධිකරණයේ තියෙනවා ගුවන්යානා ගැනීම සම්බන්ධයෙන් නඩු. ඒවා තවමත් ඇහෙනවා. එයාර් ලයින් එකට ප්ලේන් ගන්නකොට මාකට් එකේ තියෙන රේට් එකට වඩා අතිශය වැඩි මුදලකට තමයි ලීසිංවලට ප්ලේන් අරන් තියෙන්නේ. වර්තමාන රජයේ වැඩපිළිවෙළ යටතේ 2025 - 2030 දක්වා පස් අවුරුදු සැලැස්ම තුළ කටයුතු කරනවා. මේ සියල්ල කළමනාකරණය තුළ ඉදිරියේදී රටේ ජනතාවට මේ බර පටවන්න නොවෙනු ඇතැයි අපි විශ්වාස කරනවා.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
