පොලිස් වැටලීමක දී ගිනි අවියක් ක්‍රියාත්මක වීමෙන් පුද්ගලයෙකුට තුවාල

තිස්සමහාරාම ප්‍රදේශයේ පොලීසිය සිදුකළ වැටලීමක් අතරතුරදී ගිනි අවියක් ක්‍රියාත්මක වීමෙන් පුද්ගලයෙකු තුවාල ලබා ඇති බව තිස්සමහාරාම පොලීසිය පවසයි.

මෙලෙස තුවාල ලබා ඇත්තේ 28 හැවිරිදි වියේ පසුවන තරුණයෙක් බව පොලීසිය පවසයි. ඊයේ (30) රාත්‍රී 12ත් 1ත් අතර තිස්සමහාරාම පොලීසියට ලැබුණු තොරතුරකට අනුව එම ප්‍රදේශයේ සූදුපොළක් වැටලීම සඳහා තිදෙනෙකුගෙන් සමන්විත පොලිස් කණ්ඩායමක් පිටත්ව ගොස් ඇති අතර පොලීසිය එහි ළඟාවීමත් සමඟ එම සූදුපොළේ සිටි පිරිස් පළාගොස් ඇති බව පොලීසිය කියයි. 

ඔවුන් අත්අඩංගුවට යාමේදී පොලිස් සැරයන්වරයෙකු සහ වෙඩි ප්‍රහාරයට ලක්වූ පුද්ගලයා අතර පොරබැදීමක් සිදුව ඇති අතර එහිදී ගිනි අවිය ක්‍රියාත්මකවීමෙන් තුවාල ලැබූ 28 හැවිරිදි තරුණයා ප්‍රතිකාර සඳහා හම්බන්තොට රෝහලට ඇතුළත් කර තිබෙන බව පොලීසිය පවසයි. 

සිද්ධිය සම්බන්ධ වැඩිදුර විමර්ශන තිස්සමහාරාම පොලීසිය විසින් මේ වනවිට ආරම්භ කර ඇති බව තිස්සමහාරාම පොලීසිය පවසයි.

බෙලිඅත්ත කවීෂා ගුරුසිංහ