පොලිතීන් හා ප්ලාස්ටික් අයිතම 8ක් තහනමට ගැසට්ටුව ඉදිරියේදී
ශ්‍රී ලංකාවේ පොලිතීන් හා ප්ලාස්ටික් භාවිතය අවම කිරීමේ අරමුණින් පරිසර අමාත්‍යාංශය විසින් 2021 මාර්තු 31 සිට එක්වරක් පමණක් පාවිච්චි කරන පොලිතීන් හා ප්ලාස්ටික්වලින් නිෂ්පාදිත අයිතමයන් 05ක් තහනම් කරනු ලැබීය. එමෙන්ම අගෝස්තු 01 දින සිට පොලිතීන්වලින් නිෂ්පාදිත නොදිරණ ලන්ච්ෂීට් නිෂ්පාදනය, බෙදාහැරීම හා අලෙවිය ද තහනම් කරනු ලැබීය.
එමෙන්ම ඉන්පසුව තවත් පොලිතීන් හා ප්ලාස්ටික් අයිතමයන් 08ක් තහනම් කිරීම සඳහා අමාත්‍ය මණ්ඩල අනුමැතිය ලැබිනි. ඊට අදාල ගැසට් පත්‍රය ඉදිරියේ දී නිකුත් වීමට නියමිතය.
පසුගිය මාර්තු 31 සිට ක්‍රියාත්මක වන පරිදි තහනම් කරනු ලැබූ සැෂේ පැකට් ( ආහාර හා ඖෂධ නොවන) , ප්ලාස්ටික් කූර සහිත කොට්න් බඩ්, පොලිතීන්වලින් නිෂ්පාදිත සුළං පුරවන ලද සෙල්ලම් භාණ්ඩ නිෂ්පාදනය, බෙදාහැරීම හා අලෙවි කිරීම මේ වනවිට මුළුමනින්ම නැවතී තිබේ.
පරිසර අමාත්‍යාංශය විසින් ලබා ගෙන ඇති තොරතුරු පරිදි වසරකට මෙරට තුළ රුපියල් කෝටි 96ක සැෂේ පැකට් අලෙවි වී තිබේ. එමෙන්ම වාර්ෂිකව පරිසරයට මුදා හරින ලන්ච්ෂීට් ප්‍රමාණය මිලියන 5475 ඉක්මවයි. මේවා පරිසරයට එක්වීම මත කිසිදු දිනෙක දිරාපත් වන්නේ නැත. මිනිස් ඇසට නොපෙනී යාමට වසර 50 සිට 450 දක්වා කාලයක් ගත වෙන අතර ඒවා ඉන් අනතුරුව ක්ෂුද්‍ර ප්ලාස්ටික් අංශු බවටත් ඉන් පසු නැනෝ අංශු බවටත් පත්ව අවසානයේ පසට මෙන්ම ජලාශ හා සාගරයට ද එකතු වේ.
ශ්‍රී ලංකාවේ පොලිතීන් හා ප්ලාස්ටික් භාවිතය අවම කරලීම සඳහා ගන්නා ලද තීරණ අනුව මෙවර තහනම් කරන ලද සැෂේ පැකට් හා ප්ලාස්ටික් කූර සහිත කොට්න් බඩ් භාවිතය හා සුළං පුරවන ලද සෙල්ලම් භාණ්ඩ නිෂ්පාදනය, බෙදාහැරීම හා අලෙවිය තහනම් කිරීම අතිශයින්ම සාර්ථකව ඇතැයි මධ්‍යම පරිසර අධිකාරිය විසින් අමාත්‍ය මහින්ද අමරවීර මහතා වෙත දැනුම් දී තිබේ.
අපේ රටේ පානීය ජල මූලාශ්‍රවලට විශාල හානියක් සැෂේ පැකට් මගින් සිදු විය. අපේ රටේ ගංගා පද්ධතියට මෙන්ම ජලාශවලට සැෂේ පැකට් දිනපතා මිලියන ගණනින් එකතුවීම නිසා පානීය ජල මූලාශ්‍ර අපවිත්‍ර විය. එහෙත් මේ වනවිට සැෂේ පැකට් නිෂ්පාදනය, බෙදාහැරීම මෙන්ම අලෙවිය ද සම්පූර්ණයෙන්ම නැවතී තිබේ.
මේ අතර එම නිෂ්පාදන තවමත් සිදු කෙරෙන්නේ ද යන්න තවදුරටත් සොයා බැලීම සඳහා වැටලීම් සිදු කරන ලෙස පරිසර අමාත්‍ය මහින්ද අමරවීර මහතා මධ්‍යම පරිසර අධිකාරියට දැනුම් දුන්නේය. ඒ අනුව මෙම වසර අවසන් වීමට ප්‍රථම අංක 2034/34 හා 2211/51 දරණ අතිවිශේෂ ගැසට් පත්‍ර මගින් තහනම් කරන ලද පොලිතීන් හා ලන්ච්ෂීට්, ප්ලාස්ටික් අයිතම සම්බන්ධව මධ්‍යම පරිසර අධිකාරියෙන් මෙම වසර අවසන් වීමට ප්‍රථම වැටලීම් 4930ක් ක්‍රියාත්මක කිරීමට සැලසුම් කර ඇතැයි මධ්‍යම පරිසර අධිකාරිය විසින් වාර්තාවක් අමාත්‍යවරයාට බාර දී තිබේ. ඒ සඳහා නිලධාරින් 706 දෙනෙක් යෙදවීමට නියමිතය.
අපේ රටේ පරිසරයට විශාල හානියක් සිදු කළ සැෂේ පැකට් මෙන්ම පොලිතීන්වලින් නිෂ්පාදිත නොදිරණ ලන්ච්ෂීට් තහනම සාර්ථක වීම අපේ රට ලැබූ ජයග්‍රහණයක් බව ද අමාත්‍යවරයා සඳහන් කළේය. එසේ වුනත් එම නිෂ්පාදිත සමාගම් අඛණ්ඩව පරීක්ෂා කිරීමේ වැඩ පිළීවෙළ ක්‍රියාත්මක කිරීමට ද පියවර ගන්නා ලෙස අමාත්‍යවරයා උපදෙස් දුන්නේය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
