පිහිනුම් තටාකයේ ගිලි වයස අවුරුදු 07 ක පිරිමි ළමයෙකු මියගිහින්

මහනුවර ලුවි පීරිස් මාවතේ පිහිටි හෝටලයක පිහිනුම් තටාකයේ ගිලි වයස අවුරුදු 07 ක පිරිමි ළමයෙකු මිය ගොස් ඔහුගේ වැඩිමහල් සහෝදරයාද එම පිහිනුම් තටාකයේම ගිලි බරපතල තත්ත්වයෙන් මහනුවර ජාතික රෝහලට ඇතුළත් කොට ඇති බව මහනුවර මූලස්ථාන පොලිසිය කියයි . 
සිද්ධියෙන් මිය ගොස් ඇත්තේ වැරැල්ලගම කුරුදුගොල්ල ප්‍රදේශයේ පදිංචි මොහොමඩ් මිස්ජාන් නමැති ළමයෙකි .
මෙම දරුවන් දෙදෙනා තම දෙමාපියන්ද සමග අද (28) දින නිවාඩුව ගතකිරීමට මෙම හෝටලයට පැමිණ ඇති අතර දහවල් 11.00 ට පමණ මියගිය දරුවා තනිව පිහිනුම් තටාකය අසල සිටියදී ඔහු පිහිනුම් තටාකයට වැටී ඇති බව පොලිසිය කියයි . ඔහු දියේ ගිලි සිටිනු දුටු ඔහුගේ වැඩිමල් සහෝදරයා පිහිනුම් තටාකයට පැන තම බාල සහෝදරයා බේරා ගැනීමට උත්සාහ කිරීමේදී ඔහුද දියේ ගිලී තිබේ .
දිය ගිලි බරපතල තත්ත්වයෙන් සිටි බාල සහෝදරයා රෝහල කරා රැගෙන යන විටද මියගොස් සිට ඇති අතර සිද්ධිය සම්බන්ධයෙන් මහනුවර මූලස්ථාන පොලිසිය වැඩිදුර විමර්ශන සිදුකරයි .