පාස්කු ප්‍රහාරයේ වින්දිතයන්ට රු. කෝටි. 24.5ක් වන්දි ගෙවලා

පාස්කු ඉරුදින ත්‍රස්ත ප්‍රහාර හේතුවෙන් වින්දිතයින් වූ පුද්ගලයින්ට රුපියල් කෝටි 24 1/2ක වන්දි ගෙවා ඇති බව නීතීපතිවරයා කළ දැනුම් දීමක් සැළකිල්ට ගත් ශ්‍රේෂ්ඨාධිකරණය වින්දිතයන්ට වන්දි ගෙවීම පිළිබඳ සවිස්තර වාර්තාවක් මැල්කම් කාදිනල් රංජිත් හිමිපාණන් වෙත ඉදිරිපත් කිරීමට නීතිපතිවරයාට අද (27) නියෝග කළේය.

පාස්කු ඉරුදින ත්‍රස්ත ප්‍රහාරය  පිළිබඳව බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම සම්බන්ධයෙන් ගොනු කොට තිබූ මූලික අයිතිවාසිකම් පෙත්සම් වලට අදාළ වන්දි ගෙවා ඇති ආකාරය නිරීක්ෂණය කිරීම සඳහා පෙත්සම් කැඳවු අවස්ථාවේදී ඉදිරිපත් වු කරුණු සළකා බැලු විනිසුරු මඩුල්ල එලෙස නියම කළේය.

පෙත්සම් කැඳවු අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් ජනාධිපති නීතිඥ විවේකා සිරිවර්ධන මහත්මිය දැනුම් දුන්නේ එම වන්දි ගෙවා තිබෙන ආකාරය නිරීක්ෂණය කිරීම සඳහා අදාළ පෙත්සම් 12 ක් පෙත්සම් අගවිනිසුරු මුර්දු ප්‍රනාන්දු, එස්. තුරේරාජා සහ දිලිප් නවාස් යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල හමුවේ කැදවනු ලැබීය.

නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විවේකා සිරිවර්ධන මහත්මිය අධිකරණය අමතමින් ශ්‍රේෂ්ඨාධිකරණ නියෝගවලට අනුව  රුපියල් මිලියන 311 ක මුදලක් වන්දි වශයෙන් හානි පූර්ණ කාර්යාලයට ලැබී ඇතැයි කීවාය.

ජනවාරි 31 වැනිදා වන විට රුපියල් මිලියන 245 ක මුදලක් වන්දි වශයෙන් වින්දිතයින්ට ගෙවා ඇතැයි කී අතිරේක සොලිසිටර් ජනරාල්වරිය පාස්කු දා ප්‍රහාරයෙන් විඳිතයින් බවට පත්වු පුද්ගලයින් 412 දෙනෙකුට මේ යටතේ වන්දි ගෙවා ඇති බවත් ඊට මියගිය පුද්ගලයින් 215 දෙනෙකු ඇතුළත් වන බවත් කීවාය.

අධිකරණ නියෝග මත ලැබුණු වන්දි මුදල් වලින් තවත් මිලියන 65 ක් ඉතිරිව ඇැති බවත් ඒවා වෛද්‍ය ප්‍රතිකාර අවශ්‍ය කරන වින්දිතයින්ට සහ වින්දිත වැඩිහිටියන්ගේ රැකවරණ කටයුතු සඳහා යෙදවීමට අපේක්ෂා කරන බවත් අතිරේක සොලිසිටර් ජනරාල් විවේකා සිරිවර්ධන මහත්මිය පැවසුවාය.

පෙත්සම්කාර අතිඋතුම් මැල්කම් රංජිත් කාදිනල් හිමිපාණන් වෙනුවෙන් පෙනී සිටි ජනාධිපති නීතිඥ ශමිල් පෙරේරා සහ පෙත්සම්කාර ශ්‍රී ලංකා නීතීඥ සංගමය වෙනුවෙන් පෙනී සිටි ජනාධිපති නීතිඥ සංජීව ජයවර්ධන යන මහත්වරු කරුණු දක්වමින් වන්දි ගෙවීම් කටයුතු වලට අදාල සවිස්තර වාර්තා තමන්ට ලැබී නැතැයි පැවසුහ.

මේ අවස්ථාවේදී අධිකරණය අමතමින් මෙම වාර්තා පෙත්සම්කාර පාර්ශ්වයට නොදුන්නේ ඇයි? යනුවෙන් අතිරේක සොලිසිටර් ජනරාල්වරියගෙන් ප්‍රශ්න කළ අගවිනිසුරු මුර්දු ප්‍රනාන්දු මහත්මිය නඩුව අදදින කැඳවනු ලබන්නේ වින්දිතයින්ට වන්දි ගෙවා ඇති ආකාරය නිරීක්ෂණය කිරීමට බවද පෙන්වා දුන්නාය.

අදාළ වාර්තා පෙත්සම්කාර පාර්ශ්වයට ලබාදී නොතිබීමෙන් නඩුව අද දින කැඳවීමේ අරමුණ ඉටු නොවන බව පෙන්වා දුන් අගවිනිසුරුවරිය වින්දිතයින්ට වන්දි ගෙවා ඇති ආකාරය පිළිබඳ සවිස්තර වාර්තාවක් කාදිනල්තුමා ඇතුළු පෙත්සම්කාර පාර්ශවයන්ට නොපමාව ලබාදෙන ලෙස නියෝග කළාය.

එම කටයුතු විමසා බැලීම සඳහා මෙම නඩුව මැයි 21 වැනිදා යළි කැඳවන ලෙසද  ත්‍රිපුද්ගල විනිසුරු මඩුල්ල නියෝග කළේය

සචිත්‍ර ගුණසේකර