පාසල් ගුරැවරියක කුඩු විකුණා වසරක් සපිරුණු දා ලබාදුන් විශේෂ වට්ටම

පොසොන් සමය ඉලක්ක කර ගනිමින් අනුරාධපුරයට පැමිණෙන මත්ද්‍රව්‍ය ලෝලීන් හට මත්කුඩු බෙදා හැරීමට සූදානම්ව සිටි, අනුරාධපුර නගර මධ්‍යයේ ඇති, ප්‍රධාන පාසලක පුහුණු ගුරුවරියක් සහ ඇගේ සැමියා රුපියල් කෝටියකට ආසන්න හෙරොයින් මත්කුඩු තොගයක් සහ එය ප්‍රවාහනය කල කාන්තා යතුරු පැදියක් සමග අත්අඩංගුවට ගත් බව අනුරාධපුර මූලස්ථාන පොලිසිය පවසයි.

මෙලෙස අත්අඩංගුවට  පත්ව ඇත්තේ වාරියපොල පදිංචි 26 හැවිරිදි  එම ගුරුවරිය , කෑගල්ල ප්‍රදේශයේ පදිංචි 28 හැවිරිදි ඇගේ සැමියා වන, අනුරාධපුර සංචාරක නිවාඩු නිකේතනයක සූපවේදී සහායකවරයකු ලෙස කටයුතු කරන අයෙකු බවත්, එම සැකකරු සහ සැකකාරිය  අනුරාධපුර  පූජා නගරයේ කුට්ටම් පොකුණ ආසන්නයේ නිවසක තාවකාලිකව  නවාතැන්ගෙන සිට ඇති බව පොලිසිය සඳහන් කළේය.

සැකකාර මෙම යුවල මත්ද්‍රව්‍ය ජාවාරම ආරම්භ කර මේ වන විට වසරක කාලයක් සම්පූර්ණ වීම නිමිත්තෙන් , එහි වර්ෂ පූර්ණය  සැමරීම සඳහා විශේෂ දීමනාවක් ලෙස මේ දිනවල මත්කුඩු පැකට්ටුවක් සඳහා  රුපියල් 500 සිට 1000 දක්වා වට්ටමක්  ලබා දී ඇති බව පොලිසිය කියයි.

ලැබුන තොරතුරකට අනුව මෙම යුවල අත්අඩංගුවට ගත් අවස්ථාවේදී කාන්තාව සන්තකයේ තිබී හෙරොයින්  මත්කුඩු ග්‍රෑම් 40ක් සහ ඇගේ සැමියා සන්තකයේ තිබී හෙරොයින් මතුකුඩු ග්‍රෑම් 80ක ප්‍රමාණයක් සහ , ඒවා ප්‍රවාහනය කල කාන්තා යතුරු පැදියක්ද අත්අඩංගුවට   ගත් බව පොලිසිය පවසයි.

කුරුණෑගල ප්‍රදේශයේ හෙරොයින්  මත්ද්‍රව්‍ය ජාවාරම්කරුවෙකුුගෙන්  ලබා ගන්නා මත්කුඩු සැකකාර යුවල විසින් තොග හා සිල්ලර ගැනුම්කරුවන් හට  අනුරාධපුර නගරය හා පූජා නගරයේ  මාර්ග අසල විවිධ ස්ථානවල සඟවා තබන බව පොලිසිය කියයි.

යුක්තියේ මෙහෙයුමට අදාළව අනුරාධපුරයේදී අත්අඩංගුවට ගත්, වැඩිම හෙරොයින් මත්කුඩු තොගය මෙය බවද පොලිසිය  කියයි.

අත්අඩංගුවට ගත් එම සැකකාර යුවල අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි. (I J )

බී.ජි. චතුරංග