ධීවරයින් තිදෙනෙක් සමග යාත්‍රාවක් අතුරුදන්

කුඩාවැල්ල ධීවර වරායෙන් තනි දවසේ ධීවර රැකියාව කිරීමට ධීවරයින් තිදෙනකු සමග ඉකුත් 21 දා දහවල් 1.30 ට පමණ  මුහුදු ගිය ධීවර යාත්‍රාවක් මේ වන විටත් ගොඩබිමට නොපැමිණ අතුරුදහන්ව ඇතැයි තංගල්ල මූලස්ථාන පොලිසිය පවසයි . 

නාකුලුගමුව සීනිමෝදර බටහිර මල්ගම්පුර පදිංචි කරුවෙකුට අයත් මිහින්දි නමැති අතුරුදහන්ව ඇති  එක්දින ධීවර යාත්‍රාවේ කුඩාවැල්ලේ  පදිංචි වයස අවුරුදු 20, 23, 30 වයසේ පසුවන ධීවර තරුණයින් තිදෙනකු මුහුදු ගොස් ඇතැයි පොලිසිය පැවසීය . 

ඊයේ(23) එම ධීවරයින්ගේ පවුලේ අය පැමිණ තංගල්ල මූලස්ථාන පොලිසියට සිද්ධිය පිලිබදව පැමිණිලි කර ඇති අතර අතුරුදහන් ධීවර යාත්‍රාව සොයා වෙනත් බහුදින ධීවර යාත්‍රා කිහිපයක් යොදවා සොයා බැලීම් කරන බවද සිද්ධිය පිලිබදව නාවික හමුදාව දැනුම්වත් කල බවද කුඩාවැල්ල ධීවර වරායේ නිළධාරියෙකු පැවසීය .  

සිද්ධිය සම්බන්ධව  තංගල්ල මූලස්ථාන පොලිසිය වැඩිදුර පරීක්ෂණ පවත්වයි .

බෙලිඅත්ත - කවීෂා ගරුසිංහ