දේශබන්දු තෙන්නකෝන්ට එරෙහි පෙත්සම් 9ක් විභාගයට

බස්නාහිර පළාත භාර ජේෂ්ඨ නියෝජ්‍ය පොලිස්පතිවරයා වශයෙන් කටයුතු කළ දේශබන්දු තෙන්නකෝන් මහතා පොලිස්පතිවරයා වශයෙන් පත් කර ඇති ආකාරය ආණ්ඩුක්‍රම ව්‍යවස්ථාවට පටහැනි බවට තීන්දුවක් දෙන්නැයි ඉල්ලා ගොනු කර ඇති මූලික අයිතිවාසිකම් පෙත්සම් නවය විභාගයට ගැනීම සඳහා පංචපුද්ගල ශ්‍රේෂ්ඨාධිකරණ විනිසුරු මඩුල්ල අද (24) දින නියම කළේය.

තම සේවාදායකයා පොලිස්පතිධුරයේ රාජකාරි කිරීම වළක්වාලමින් අතුරු තහනම් නියෝගයක් නිකුත් කර ඇති හෙයින් කඩිනමින් පෙත්සම විභාගයට ගැනීමට දින නියම කරන්නැයි වගඋත්තරකාර දේශබන්දු තෙන්නකෝන් මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා කළ ඉල්ලීමක් සළකා බැලු පංචපුද්ගල ශ්‍රේෂ්ඨාධිකරණ විනිසුරු මඩුල්ල පෙත්සම් මැයි 06,07 සහ 08 යන දින වල විභාගයට ගැනීමට නියම කළේය.

ශ්‍රේෂ්ඨාධිකරණ විනිසුරුවරුන් වන ප්‍රීති පද්මන් සූරසේන, යසන්ත කෝදාගොඩ, දිලීප් නවාස්, ශිරාන් ගුණරත්න සහ අචල වෙන්ගප්පුලි යන මහත්වරුන්ගෙන් සැදුම්ලත් පංචපුද්ගල විනිසුරු මඩුල්ල හමුවේ පෙත්සම සලකා බැලිණි.

අතිඋතුම් මැල්කම් රංජිත් කාදිනල් හිමිපාණන්, තරුණ ජනමාධ්‍යවේදීන්ගේ සංගමය ඇතුළු පාර්ශව විසින් ගොනු කර ඇති මෙම මූලික අයිතිවාසිකම් පෙත්සම් වල වගඋත්තරකරුවන් වශයෙන් ව්‍යවස්ථාදායක සභාව ඇතුළු පිරිසන් නම් කර ඇත.

ව්‍යස්ථාදායක සභාව ඉදිරිපත් කළ නිර්දේශ වලට පටහැනිව දේශබන්දු තෙන්නකෝන් මහතා පොලිස්පතිවරයා වශයෙන් පත්කර ඇතැයි පෙත්සම්කරුවෝ දේශබන්දු තෙන්නකෝන් මහතා පොලිස්පතිධූරයට පත් කිරීමට ගනු ලැබූ තීරණය නීතියට පටහැනි බවට තීන්දු කරන්නැයි ඉල්ලා සිටිති.

පෙත්සම් සලකා බැලූ අවස්ථාවේදී වගඋත්තරකාර දේශබන්දු තෙන්නකෝන් මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා කරුණු දක්වමින් සිය සේවාදායකයා පොලිස්පතිධුරයේ රාජකාරි ඉටු කිරීම වළක්වාලමින් අතුරු තහනම් නියෝගයක් නිකුත් කර ඇති හෙයින් මෙම  පෙත්සම විභාගයට ගැනීමට කඩිනමින් දින දෙන්නැයි ඉල්ලා සිටියේය.

කරුණු සලකා බැලු විනිසුරු මඩුල්ල මෙම පෙත්සම් මැයි 06, 07 සහ 08 යන දිනවල විභාගයට ගැනීමට තීරණය කළේය.

සචිත්‍ර ගුණසේකර